திருமந்திரம் - சிறப்பும் வரலாறு

திருமூலதேவநாயனாரின் திருமந்திரமாலை, திருமந்திரம் என்ற பெயரால் வழங்கப்படும். இந்நூல் சைவத் திருமுறைகளுள் பத்தாவதாக இடம் பெற்றுள்ளது. தமிழ் மொழியில் பெருஞ்சிறப்புக்கு உரிய முதன்மையான நூல்களைத் தொகுத்து உரைக்கும் ஒரு பழம்பாடல் உள்ளது. அதில் திருமந்திரமும் இணைக்கப் பெற்றிருப்பது இதன் சிறப்பிற்குச் சான்று கூறி நிற்கிறது. சைவ ஆகமங்களின் சாரமாகத் திகழும் இந்நூலை, தமிழில் எழுந்த சைவசமயஞ் சார்ந்த ஒரு கலைக்களஞ்சியம் என்றே கூறலாம்.

திருமந்திரம் ஒன்பது உட்பிரிவுகளைக் கொண்டது. ஒவ்வொரு பிரிவும் ஒரு ‘தந்திரம்’ எனக் குறிக்கப்பட்டுள்ளது. இந்த ஒன்பது தந்திரங்களும், ஆகமங்கள் ஒன்பதின் சாரமாக அமைந்துள்ளன. ஆகமங்கள் 28, அவற்றுள் ஒன்பதின் சாரமாக 9 தந்திரங்கள் அமைந்துள்ளன. அந்த ஆகமங்கள் வருமாறு: காரணம், காமிகம், வீரம், சிந்தம், வாதுளம், வியாமளம், காலோத்தரம், சுப்பிரம், மகுடம் என்பன.

தந்திரம் ஒன்பது சார்வு மூவாயிரம்

சுந்தரன் ஆகமச் சொன்மொழிந் தானே

என்ற சிறப்புப் பாயிரப்பகுதி இதனை உறுதி செய்கிறது. இந்நூல் மூவாயிரம் பாடல்களைக் கொண்டுள்ளது.

திருமூலர் – வரலாறு:

திருமூலர் வரலாறு குறித்தும் பாயிரப் பகுதியில் பாடல்கள் இடம் பெற்றுள்ளன. திருமூலர் பெரியபுராண நாயன்மார் வரிசையிலும் இடம் பெற்றுள்ளார். இவர் வரலாற்றைப் பெரிய புராணமும் எடுத்துரைக்கிறது. வடநாட்டிலிருந்து தென்னாடு வந்த முனிவர் ஒருவர் மாடு மேய்க்கும் ஓர் இளைஞன் உடலில் கூடுவிட்டுக் கூடுபாய்ந்து மூலன் எனப் பெயர் பெற்றார். திருவாவடு துறையில் யோகத்தில் பலகாலம் இருந்து இத்திரு மந்திரமாலையை  உலகுக்கு வழங்கினார்.  திருமூலரே,

என்னை நன்றாக இறைவன் படைத்தனன்

தன்னை நன்றாகத் தமிழ்செய்யு மாறே..(திருமந்திரம் : 81)  என்று குறிப்பிட்டிருப்பது கருதத்தக்கது. தமிழில் ஆகமங்களின் சாரங்களைத் தொகுத்தளிப்பதே அவர் வருகையின் நோக்கம் என்பது உறுதியாகிறது.

யான்பெற்ற இன்பம் பெறுக இவ்வையகம்.... (திருமந்திரம் : 147)  என்ற அரிய தொடர் இப்பகுதியில் இடம்பெற்றுள்ளது.

விநாயகர் காப்பு

திருமந்திரத்தின் முதல் தந்திரம் முதல் ஒன்பதாவது தந்திரம் வரையிலான ஒவ்வொரு தந்திரமும் ஒவ்வொரு சமய உண்மையை நுட்பமுற எடுத்துரைப் பனவாக அமைந்துள்ளன. முன்னதாக அமைந்துள்ள பாயிரத்தில் கடவுள் வாழ்த்து, வேத ஆகமங்களின் சிறப்பு, திருமூலர் வரலாறு முதலியன விரித்துரைக்கப் பெற்றுள்ளன. இந்நூல் விநாயகர் காப்பு ஒன்றுடன் தொடங்குகின்றது.

ஐந்து கரத்தனை யானை முகத்தனை

இந்தின் இளம்பிறை போலும் எயிற்றனை

நந்தி மகன்தனை ஞானக் கொழுந்தினைப்

புந்தியில் வைத்துஅடி போற்று கின்றேனே.....(திருமந்திரம் விநாயகர் காப்பு)

(இந்து = சந்திரன், எயிற்றன் = கொம்பினையுடையவன், நந்தி மகன் = விநாயகன், ஞானக்கொழுந்து = அறிவே வடிவானவன்) என்பது திருமந்திரத்தின் காப்புச் செய்யுள். கடவுள் வாழ்த்துப் பகுதியில் சிவபெருமானின் பெருமை பேசும் 50 பாடல்கள் இடம் பெற்றுள்ளன.

தீயினும் வெய்யன் புனலினும் தண்ணியன்

ஆயினும் ஈசன் அருள்அறி வார்இல்லை

சேயினும் நல்லன் அணியன்நல் அன்பர்க்குத்

தாயினும் நல்லன் தாழ்சடை யோனே.......(திருமந்திரம் : 8)

(வெய்யன் = வெப்பம் மிக்கவன், தண்ணியன் = குளிர்ச்சியானவன். அணியன் =அடியவர்க்கு நெருக்கமானவன்) சிவனின் மேலான கருணைத் திறத்தைச் சுட்டிக்காட்டுகிறது. எனினும் மக்கள் அவன் கருணையை முழுவதும் உணர்ந்து வழிபட்டு வாழ்வு பெற்றிலர் என்ற திருமூலரின் மன வருத்தம் இப்பாடலில் பதிவாகியுள்ளது. 

==============================================

வேத ஆகமச் சிறப்பு:
வேதம், ஆகமம் என்ற இரண்டு நூல்களைப் பற்றியும் திருமூலர் குறிப்பிடுகிறார். இரண்டுமே இறைவனிடமிருந்து வந்தவை: வேதம் பொது; ஆகமம் சிறப்பு என்பதும் அவர் கருத்து. ஆகமம் என்ற சொல்லுக்கு ‘வந்தது’ என்பது பொருள். இச்சொல், சிவபெருமானிடமிருந்து இந்நூல்கள் வந்தன என்பதைக் குறிக்கிறது. ஆகமம் என்ற சொல்லை மற்றொரு விதமாகவும் பிரித்துப் பொருள் காண்கிறார்கள். ஆ என்பது பாசம்; க என்பது பசு; ம என்பது பதி. எனவே இம்மூன்றையும் ஆகமம் கூறுகிறது.

திருமந்திரம்; தந்திரங்களும் உள்ளீட்டுச் செய்திகளும்:

தந்திரங்களின் உள்ளீட்டுச் செய்திகள்
தந்திர வரிசை	உள்ளீடு
ஒன்று	உபதேசம்,  யாக்கை நிலையாமை, கொல்லாமை
	கல்வி, கள்ளுண்ணாமை
இரண்டு	சிவனின் எட்டுவகை வீரச் செயல்கள்
	ஐந்தொழில்கள்; சிவனையும், குருவையும்
	நிந்திப்பதால் வரும் துன்பங்கள்
மூன்று	யோகக் கலைகள், அஷ்டமாசித்திகள்
நான்கு	திரு அம்பலச் சக்கரம், நவகுண்டம், வயிரவ மந்திரம்
ஐந்து	இறைவனை அடைவதற்கு உரிய நூல் நெறிகள்:
	சரியை, கிரியை, யோகம், ஞானம், சத்தி நிபாதம்
ஆறு	குருதரிசனப் பயன், திருநீற்றின் சிறப்பு, துறவு நிலை
ஏழு	ஆறு ஆதாரங்கள், சிவபூசை, குருபூசை, சமாதி அமைத்து வழிபடும் முறை, உயிர் இலக்கணம்
எட்டு	பக்திநிலை, முக்திநிலை
ஒன்பது	நுண்பொருள் விளக்கம் (சூனியசம்பாஷணை)

திருமந்திரம் - அரிய தொடர்கள்: 

திருமந்திரம் சைவ சமயத்திற்கு மட்டும் உரிய ஒரு சமய நூலாக அமையாது, உலக மக்களுக்கெல்லாம் அறத்தையும், ஆன்ம ஈடேற்றத்தையும், மருத்துவக் கூறுகளையும் எடுத்துரைக்கும் பொது நூலாக அமைந்துள்ளது. கீழே கொடுக்கப்பட்டுள்ள அரிய பாடல் பகுதிகள் திருமந்திரத்தின் சிறப்புக்குக் கட்டியம் கூறி நிற்பன. 

ஒன்றே குலமும் ஒருவனே தேவனும்.... பாடல் -2104

சிவனொடு ஒக்கும் தெய்வம் தேடினும் இல்லை... பாடல்: 5

ஆர்க்கும் இடுமின்: அவர்இவர் என்னன்மின்....பாடல்: 250

ஈசன் அடியார் இதயம் கலங்கிடத்
தேசமும் நாடும் சிறப்பும் அழிந்திடும்...பாடல்: 534

உடம்பார் அழியில் உயிரார் அழிவர்....
உடம்பை வளர்த்தேன் உயிர்வளர்த் தேனே...பாடல்: 724

குருவே சிவம்எனக் கூறினன் நந்தி...பாடல்: 1581
மானுடர் ஆக்கை வடிவு சிவலிங்கம்..பாடல்: 1726  

(நந்தி = இங்கே சிவபெருமானைக் குறிக்கும், ஆக்கை - உடல்)  இவைபோன்ற நூற்றுக்கணக்கான அரிய தொடர்கள் திருமந்திரத்துள் இடம்பெற்றுள்ளன.

அன்பே சிவம்:

 

திருமந்திரம் ஆகமத்தின் சாரமாக அமைந்திருந்தாலும் அனைவரும் உணரும் எளிமையும், இனிமையும் உடைய பாடல்கள் பலவற்றைத் தன்னகத்தே கொண்டுள்ளது. ‘அன்பே சிவம்’ என்ற தொடரைப் பலரும் அறிவர். மனிதர்கள் ஏனைய மனிதர்கள்பால் செலுத்தும் அன்பில்தான் உலகம் வாழ்ந்து கொண்டிருக்கிறது. உலகத்தில் தோன்றிய கடவுள் சார்புடைய மதங்களும், கடவுள் மறுப்புச் சமயங்களும் கூட அன்பினைப் பெரிதும் போற்றியே உரைக்கின்றன. திருவள்ளுவர் முதலிய அறநூலாசிரியர்களும் அன்பின் சிறப்பையும், இன்றியமையாமையையும் எடுத்துரைத்துள்ளனர். 

சைவர்களின் இறைவன் சிவன். அவன் யார்? அவன் இயல்பு எத்தகையது என்ற வினாக்களுக்குத் திருமூலர் தரும் விடை ஆழ்ந்த பொருட்சிறப்புடையது. அன்புதான் எங்கள் சிவன். சிவம் வேறு அன்பு வேறு என்பார் அறியாமை மிக்கவர்கள். இரண்டும் ஒன்றே என்று உணரும் உணர்வில் இறைமைப் பேறு வாய்க்கும்.

அன்பும் சிவமும் இரண்டு என்பர் அறிவிலார்
அன்பே சிவமாவது ஆரும் அறிகிலார்
அன்பே சிவமாவது ஆரும் அறிந்தபின்
அன்பே சிவமாய் அமர்ந்திருந் தாரே...(திருமந்திரம்: 270)

என்பது அன்பின் சிறப்புரைக்கும் அரிய பாடல்.

மரமும் யானையும்:

உலகம் வேறு, இறைவன் வேறானவன் என்று கருதும் கருத்து சமய நம்பிக்கை உடையவர்களிடமும் உள்ளது. குழந்தை மரத்தால் செய்யப்பட்ட யானை பொம்மையைக் கண்டு ‘யானை! யானை’ என்று அஞ்சித் தாயிடம் தஞ்சம் அடைகிறது. தாயோ இது யானை இல்லை மரம் என்று கூறிக் குழந்தையின் அச்சம் நீக்குகிறாள் என்றால் குழந்தை கண்டது யானையா? மரமா? என்ற ஐயம் எழுகிறது. 

யானையாகக் கண்ட குழந்தைக்கு மரம் என்பது புலப்படவில்லை; மரம் என்ற தெளிவு பெற்ற தாய்க்கு யானை புலப்படவில்லை. இவற்றைப் போல் உலகத்தையும், உலகப் பொருள்களையும் இறைவனாகவே காண்பார்க்கு அவை புலப்படுவதில்லை. உலகமாகவே காண்பார்க்கு இறைமை புலனாவதில்லை. இவ்வழகிய உண்மையைத் திருமந்திரம் மிக அழகிய கவிதை ஒன்றில் வைத்து விளக்குகிறது.

மரத்தை மறைத்தது மாமத யானை
மரத்தின் மறைந்தது மாமத யானை
பரத்தை மறைத்தது பார்முதல் பூதம்
பரத்தின் மறைந்தது பார்முதல் பூதமே...(திருமந்திரம்: 2290)

இக்கருத்தையொட்டியே நாயைக்கண்டால் கல்லைக் காணோம்; கல்லைக் கண்டால் நாயைக் காணோம் என்ற பழமொழி எழுந்தது. எளிய இனிய எடுத்துக்காட்டுகளால் அமைந்துள்ள இத்தகு கவிதைகள் திருமந்திரத்தில் நிறைவாக இடம் பெற்றுள்ளன.

மனிதநேயப் பரிவு:

 

சைவம் மனித நேயத்தை வற்புறுத்தும் ஓர் அன்பு நெறி. சிற்றுயிர்கள் இடத்தும் கருணை காட்டவேண்டும் என்று அது வற்புறுத்துகின்றது. இறைவன் உலகத்தையும்,     நுகர் பொருள்களையும் உயிர்கள் பெற்று இன்புறுவதற்கே படைத்தளித்தான். உயிர்களிடமிருந்து இறைவன் அன்பு ஒன்றைத் தவிர வேறு யாது ஒன்றும் பெற விரும்புவதில்லை. ஆனால் சமயவாதிகள், சடங்கு நெறியில் பற்றுக் கொண்டு நின்று, மனிதனின் பசிக்கு உணவிட விரும்பாது இறைவனுக்குப் படையலிட்டு மகிழ்கின்றனர். இறைவன் மனிதன் அளிக்கும் உணவையும், படையலையும் உண்டு மகிழ்கின்றானா என்றால் இல்லை. இறைவன் கவனத்திலும் கணக்கிலும் அவனுக்குப் படைக்கப்படும் படையல் இடம் பெறுவதில்லை. அவன் கணக்கில் இடம்பெற விரும்பினால் பசித்திருப்போருக்கு உணவு அளியுங்கள். அதுவே அவனைச் சென்றடையும் அரிய பெருநெறி என்று காட்டுகிறார் திருமூலர்.

படமாடக் கோயில் பகவற்கு ஒன்று ஈயில்
நடமாடக் கோயில் நம்பர்க்கு அங்குஆகா
நடமாடக் கோயில் நம்பர்க்கு ஒன்று ஈயில்
படமாடக் கோயில் பகவற்கு அதுஆமே...(திருமந்திரம்: 1857)

(படமாடக் கோயில் = இறைவன் உருவத்தை ஓவியமாக எழுதி வைத்துள்ள இடம், பகவன் = இறைவன், நடமாடக் கோயில் நம்பர் = நடமாடும் கோயிலாகிய மனிதர்கள், ஆமே = போய்ச் சேரும்) அது என்ன ‘நம்பர்க்கு’ என்று நீங்கள் முணுமுணுப்பது என் காதில் விழுகிறது; ‘நம்பர்’ என்ற சொல் ‘நம்மவர், எம்மைப்போன்ற மனிதர்கள்’ என்ற பொருள் தரும். மனிதரின் உள்ளத்தில் இறைவன் குடி கொண்டுள்ளான். எனவே மனிதர்கள் இறைவனின் நடமாடும் கோயில்கள், நடமாடும் கோயில்களாகிய நம் போன்ற மனிதர்க்கு ஒன்று கொடுப்பது இறைவனுக்குக் கொடுப்பதற்கு ஒப்பாகும். 
 

வாழ்வியல் உண்மைகள்:

இறைவனைச் சென்று அடைதற்கு உரிய எளிய வழி குருவை வழிபடுதலால் கிட்டும். பிறன் மனை நோக்காத பேராண்மையை ஆடவர் பெறல் வேண்டும். காக்கை தன் இனத்தைக் கூவி அழைத்துக் கலந்து உண்பது போல், சக மனிதர் களோடு கலந்து உண்ணல் வேண்டத்தக்கது. கற்றவர்களுக்கு மட்டுமே பேரின்பம் வாய்க்கும். கேள்விச் செல்வமே மனிதர்களுக்கு உற்றதுணை. மிகுந்த காமமும் கள்ளுண்டலும் கீழோர் என்று அடையாளம் காட்டும். 

விரும்பியவாறு ஆண் அல்லது பெண் குழந்தை பெற்றுக் கொள்வதற்குரிய மூச்சுப்பயிற்சி முறை, (வியப்பாக உள்ளதா? திருமந்திரம் பாடலில் இவ்விவரம் தரப்பட்டுள்ளது: பாடல் எண்-482) குழந்தைகள் குருடாய், ஊமையாய், முடமாய்ப் பிறப்பதற்குரிய காரண விளக்கம், திருக்கோயில் வழிபாட்டின் இன்றியமை யாமை முதலான பல அரிய செய்திகளை வழங்கும் களஞ்சியமாகத் திருமந்திரம் அமைந்துள்ளது.

திருமூலரின் திருமந்திரம் - பாயிரம்

237 பதிகங்கள், 3000 பாடல்கள் : பொழிப்புரை : முனைவர் சி.அருனைவடிவேல் முதலியார்.

பாயிரம்: பாடல்கள் 39  

பாயிரம் : பாடல் எண் : 1

கடவுள் வாழ்த்து

ஒன்றவன் றானே இரண்டவன் இன்னருள்

நின்றனன் மூன்றினுள் நான்குணர்ந் தான்ஐந்து

வென்றனன் ஆறு விரிந்தனன் ஏழும்பர்ச்

சென்றனன் தான்இருந் தான்உணர்ந் தெட்டே.

பொழிப்புரை :  ஒருபொருளாய் உள்ளவன் முதற்கடவுளே; வேறில்லை. அவனது அருள், `அறக்கருணை, மறக்கருணை` என இரண்டாய் இருக்கும். அவ் அருள்காரணமாக அவன், `இலயம், போகம், அதிகாரம்` என்னும் மூன்று நிலைகளில் நிற்பான். நின்று, `அறம், பொருள், இன்பம், வீடு` என்னும் உறுதிப் பொருள் நான்கனையும் தானே உணர்ந்து உலகிற்கு உணர்த்தினான். செவிமுதலிய ஐம்பொறிகளின் வழி நுகரப்படும் ஓசை முதலிய ஐம்புலன்களின் மேல் எழுகின்ற ஐந்து அவாவினையும் வென்றான். `மந்திரம், பதம், வன்னம், புவனம், தத்துவம், கலை` என்னும் ஆறு அத்துவாக்களாக விரிந்தான். `பிரம லோகம், விட்டு ணுலோகம், உருத்திர லோகம், மகேசுர லோகம், சதாசிவ லோகம், சத்தி லோகம், சிவ லோகம்` என்னும் ஏழுலகங்களுக்கும் மேற்சென்று தானேயாய் இருந்தான். அவனை, நெஞ்சே, நீ அறிந்து அடை.

****************************************************

பாடல் எண் : 2

நுதலிய பொருள்

போற்றிசைத் தின்னுயிர் மன்னும் புனிதனை

நாற்றிசைக் கும்நல்ல மாதுக்கு நாதனை

மேற்றிசைக் குள்தென் திசைக்கொரு வேந்தனாம்

கூற்றுதைத் தானையான் கூறுகின் றேனே.

பொழிப்புரை :  மலமாசகன்ற தூய உயிரிடத்து நிலைபெற்று விளங்கும் தூயவனும், உலகம் முழுவதற்கும் நலந் தருபவளாகிய அம்மைக்குக் கணவனும், தென்திசைக்குத் தலைவனாம் கூற்றுவனை உதைத்தவனும் ஆகிய சிவபெருமானது பெருமையை யான் துதிமுறையால் கூறுவேன்!

****************************************************

பாடல் எண் : 3

நூற் சிறப்பு

ஒக்கநின் றானை உலப்பிலி தேவர்கள்

நக்கன்என் றேத்திடும் நம்பனை நாள்தொறும்

பக்கம்நின் றார்அறி யாத பரமனைப்

புக்குநின் றுன்னியான் போற்றுகின் றேனே.

பொழிப்புரை :  எண்ணில்லாத தேவர்களில் ஒருவனாய் அவர் களோடொப்ப நிற்பவனும், அவ்வாறு நிற்பினும் அவர் அனை வராலும் என்றும் வணங்கப்படுபவனும், தன்னை அடைந்தவர் களாலும் தன் தன்மை முழுதும் அறியப்படாத மேலானவனும், ஆகிய சிவபெருமானது பெருமையை யான் அவனுள் அடங்கிநின்று உணர்ந்து துதிக்கின்றேன்.

****************************************************

பாடல் எண் : 4

அகலிடத் தார்மெய்யை அண்டத்து வித்தைப்

புகலிடத் தென்மெய்யைப் போதவிட் டானைப்

பகலிடத் தும்இர வும்பணிந் தேத்தி

இகலிடத் தேஇருள் நீங்கிநின் றேனே.

பொழிப்புரை :  மண்ணுலகத்தவராகிய மக்கட்கும், விண்ணுலகத்தவராகிய தேவர்கட்கும் முதலாய் நிற்பவனும், வந்த இடத்திலே எனது உடம்பை விழச்செய்தவனும் ஆகிய சிவபெருமானை நான் பகலும், இரவும் வணங்கியும், துதித்தும் மயக்கத்தைச் செய்யும் இவ்வுலகத்திற்றானே மயக்கமின்றி இருக்கின்றேன்.

****************************************************

பாடல் எண் : 5

பெற்றமும் மானும் மழுவும் பிரிவற்ற

தற்பரன் கற்பனை யாகும் சராசரத்

தற்றமும் நல்கி அடியேன் சிரத்தினில்

நற்பத மும்அளித் தான்எங்கள் நந்தியே.

 

பொழிப்புரை :  எங்கள் நந்தி பெருமான், ஆனேறு, மான், மழு என்பவற்றை விடாது கொண்டுள்ள சீகண்ட பரமேசுரனது உபதேசப் பொருளாகிய பொருட் பெற்றியாம் மறைபொருளையும் எனக்கு விளக்கி, தமது ஞானத்தைத் தரும் திருவடிகளையும் அடியேனது தலைமேல் சூட்டியருளினார்.

****************************************************

பாடல் எண் : 6

நந்தி அருள்பெற்ற நாதரை நாடிடின்

நந்திகள் நால்வர் சிவயோக மாமுனி

மன்று தொழுத பதஞ்சலி வியாக்கிரமர்

என்றிவர் என்னோ டெண்மரு மாமே.

 

பொழிப்புரை :  நந்திபெருமானது அருளைப்பெற்ற ஆசிரியன்மார் யாவர் என்று ஆராயுமிடத்து, அவரோடு ஒத்த நால்வரும், சிவயோக முனிவரும், தில்லை அம்பலத்தை வணங்கிய பதஞ்சலி, வியாக்கிர பாதரும் என்ற இவர் என்னொடுகூட எண்மருமாவர் என்பதாம்.

****************************************************

பாடல் எண் : 7

நந்தி அருளாலே நாதனாம் பேர்பெற்றேன்

நந்தி அருளாலே மூலனை நாடினேன்

நந்தி அருளாவ தென்செயும் நாட்டினில்

நந்தி வழிகாட்ட நான்இருந் தேனே.

 

பொழிப்புரை :  நந்தி பெருமானது அருளால் நான், ஆசிரியன் எனப் பெயர் பெற்றேன். பின்பு மூலன் உடலைப் பற்றுக்கோடாகக் கொண்டேன். அவரது அருள் இவ்வுலகில், நேரே எதனைச் செய்யும்? ஒன்றையும் செய்யாது. அதனால், அவரது அருள் வழியை உலகிற்கு உணர்த்த நான் இங்கிருக்கின்றேன்.

****************************************************

பாடல் எண் : 8

மந்திரம் பெற்ற வழிமுறை மாலாங்கன்

இந்திரன் சோமன் பிரமன் உருத்திரன்

கந்துருக் காலாங்கி கஞ்ச மலையனோ

டிந்த எழுவரும் என்வழி யாமே.

பொழிப்புரை :  எனது நூலாகிய இத்திருமந்திரத்தைப் பெற்று வழி வழியாக உணர்த்த இருப்பவர், மாலாங்கன், இந்திரன், சோமன், பிரமன், உருத்திரன், தறிபோன்ற உருவத்துடன் யோகத்தில் இருக்கும் காலாக்கினி, கஞ்சமலையன் என்னும் எழுவருமாவர். இவரே என்வழியினர்.

****************************************************

பாடல் எண் : 9

நால்வரும் நாலு திசைக்கொன்றும் நாதர்கள்

நால்வரும் நானா விதப்பொருள் கைக்கொண்டு

நால்வரும் நான்பெற்ற தெல்லாம் பெறுகென

நால்வரும் தேவராய் நாதரா னார்களே.

 

பொழிப்புரை :  நந்தி பெருமானுக்கு மாணாக்கராகிய எண்மருள், நந்திகள் எனப்பட்ட நால்வரும் எல்லா உலகங்கட்கும் பொருந்திய ஆசிரியர்களாய், அறம் முதலாக நால்வகைப்பட்டுப் பற்பல வகையாக விரிந்த உறுதிப்பொருள் அனைத்தையும் உணர்ந்து, நான் பெற்ற பேற்றினை உலகம் பெறுவதாக என்னும் பேரருள் உடையராய், அதனால் சிவகணத்துள்ளே ஆசிரியராயினர்.

****************************************************

பாடல் எண் : 10

மொழிந்தது மூவர்க்கும் நால்வர்க்கும் ஈசன்

ஒழிந்த பெருமை இறப்பும் பிறப்பும்

செழுஞ்சுடர் மூன்றொளி யாகிய தேவன்

கழிந்த பெருமையைக் காட்டகி லானே.

 

பொழிப்புரை :  பிறப்பு இறப்புகள் இல்லாத பெருமையை உடைய முக்கட் கடவுள் தனது எல்லையில்லாத பெருமையைப் பிறர்க்குக் காட்டமாட்டானாயினும், அதனை அவன் ஆசான் மூர்த்தி வாயிலாகக் காட்டியது மேற்குறித்த நால்வரோடு, சிவயோக மாமுனி முதலிய மூவர்க்குமேயாம்.

****************************************************

பாடல் எண் : 11

எழுந்துநீர் பெய்யினும் எட்டுத் திசையும்

செழுந்தண் நியமங்கள் செய்மின் என் றண்ணல்

கொழுந்தண் பவளக் குளிர்சடை யோடே

அழுந்திய நால்வர்க் கருள்புரிந் தானே.

பொழிப்புரை :  தன்னைவிட்டு இமையளவும் பிரிய விரும்பாத நந்திகள் நால்வர்க்கும் சிவபெருமான் எதிர்ப்படத்தோன்றி, உலகம் அழிகின்ற ஊழிக் காலத்திலும் நீங்கள் நம்மை வழிபட்டிருப்பீராக என்று அருள்புரிந்தான்.

****************************************************

பாடல் எண் : 12

நந்தி இணையடி நான்தலை மேற்கொண்டு

புத்தியி னுள்ளே புகப்பெய்து போற்றிசெய்

நந்தி மதிபுனை அரனடி நாள்தொறுஞ்

சிந்தைசெய் தாகமம் செப்பலுற் றேனே.

பொழிப்புரை : என் ஆசிரியராகிய நந்தி பெருமானது இரு திருவடிகளையும் என் சென்னியிலும், சிந்தையிலும் கொண்டு, வாயினாலும் துதித்து, அவ்வாற்றானே சிவபெருமானது திருவருட் பெருமையை இடைவிடாது சிந்தித்து உணர்ந்து, அங்ஙனம் உணர்ந்த வாற்றால், சிவாகமப் பொருளைக் கூறத் தொடங்கினேன்.

****************************************************

பாடல் எண் : 13

செப்பும் சிவாகமம் என்னுமப் பேர்பெற்றும்

அப்படி நல்கும் அருள்நந்தி தாள்பெற்றுத்

தப்பிலா மன்றில் தனிக்கூத்துக் கண்டபின்

ஒப்பில்ஒரு கோடி யுகமிருந் தேனே.

பொழிப்புரை : உயர்த்துச் சொல்லப்படுகின்ற `சிவாகமம் என்னும் பெயரையுடைய நூலைப் பெற்ற பின்பும், அவற்றின் பொருளை உள்ளவாறு உணர்த்துகின்ற நந்தி பெருமானது ஆணை வழி, அழிவில்லாத தில்லையம்பலத்தை அடைந்து அங்குச் சிவபெருமான் செய்யும் ஒப்பற்ற நடனத்தைக் கண்டு மீண்டபின், உடம்போடிருக்க உடன்படாத நிலையிலே பலகாலம் உடம்போடு இருந்தேன்.

****************************************************

பாடல் எண் : 14

இருந்தஅக் காரணம் கேள்இந் திரனே

பொருந்திய செல்வப் புவனா பதியாம்

அருந்தவச் செல்வியைச் சேவித் தடியேன்

பரிந்துடன் வந்தனன் பத்தியி னாலே.

பொழிப்புரை :  இந்திரனே, உடன்பாடின்றியும் நான் அவ்வாறு நெடுநாள் உடம்போடிருந்த காரணத்தைக் கூறுகின்றேன்; கேள். எல்லா உலகங்கட்கும் தலைவியாம் அருந்தவ மாகிய செல்வியை அடியேன் அன்பினால் விரும்பி உடன் நின்று பணிந்து வந்தேன்.

****************************************************

பாடல் எண் : 15

சதாசிவம் தத்துவம் முத்தமிழ் வேதம்

மிதாசனி யாதிருந் தேன்நின்ற காலம்

இதாசனி யாதிருந் தேன்மனம் நீங்கி

உதாசனி யாதுட னேஉணர்ந் தோமால்.

பொழிப்புரை : இறப்புத் தோன்றாதவனாய் இருந்து வாழ்ந்த அக்காலம் முழுதும் உலகத்தில் விருப்பம் தோன்றாது மனஒடுக்கம் உடையவனாயே இருந்தேன். அவ்வாறிருக்கும் பொழுது, சிவபெருமானது ஐந்தொழில்நிலை, பொருட்பெற்றி, தமிழ்மொழி, வேதம் என்னும் இவைகளைப் புறக்கணியாது விருப்பத்துடன் கற்று உணர்ந்தேன்.

****************************************************

பாடல் எண் : 16

மாலாங்க னேஇங் கியான்வந்த காரணம்

நீலாங்க மேனியள் நேரிழை யாளொடு

மூலாங்க மாக மொழிந்த திருக்கூத்தின்

சீலாங்க வேதத்தைச் செப்பவந் தேனே.  

பொழிப்புரை :  மாலாங்கனே, திருக்கயிலையை விட்டு இத்தமிழ்நாட்டிற்கு நான் வந்தகாரணம் கேள். சிவபெருமான் முதற்கண் உமை அம்மைக்கு முதல் நூலாகச் சொல்லிய சிவாகமத்தின் பொருளைச் சொல்லுதற்காகவே வந்தேன்.

****************************************************

பாடல் எண் : 17

நேரிழை யாவாள் நிரதி சயானந்தப்

பேருடை யாள்என் பிறப்பறுத் தாண்டவள்

சீருடை யாள்சிவன் ஆவடு தண்டுறை

சீருடை யாள்பதம் சேர்ந்திருந் தேனே.

பொழிப்புரை : `உமையம்மை` என்று சொல்லப்படுபவள் வரம்பில் இன்பமாகின்ற பெருமையை உடையவள். அவள் எனது பிறப்பை அறுத்து வீடு தந்து என்னை ஆட்கொண்டவள்; மிக்க புகழை உடையவள்; சிவபெருமான் எழுந்தருளியுள்ள திருவாவடுதுறையாகிய இச்சிறந்த திருத்தலத்தைத் தனதாக உடையவள். அவள் திருவடி நிழலில் இதுபொழுது இருக்கின்றேன்.

****************************************************

பாடல் எண் : 18

சேர்ந்திருந் தேன்சிவ மங்கைதன் பங்கனைச்

சேர்ந்திருந் தேன்சிவன் ஆவடு தண்டுறை

சேர்ந்திருந் தேன்சிவ போதியின் நீழலில்

சேர்ந்திருந் தேன்சிவன் நாமங்கள் ஓதியே.

பொழிப்புரை :  சீருடையாள் பதம் சேர்ந்தமையால் அவளை ஒருபாகத்தில் உடைய சிவனையும் சேர்ந்திருக்கின்றேன். இத் திருவாவடுதுறை அவளுடையது மட்டுமன்று; அவனுடையதுந்தான். இங்குச் சிவஞானத் திருவின்கீழ் அவனது திருப்பெயர் பலவற்றையும் ஓதித் துதித்துக் கொண்டிருக்கின்றேன்.

****************************************************

பாடல் எண் : 19

இருந்தேன்இக் காயத்தே எண்ணிலி கோடி

இருந்தேன் இராப்பகல் அற்ற இடத்தே

இருந்தேன் இமையவர் ஏத்தும் பதத்தே

இருந்தேன்என் நந்தி இணையடிக் கீழே.

பொழிப்புரை :  இங்கும் இவ்வுடம்பிலே பல்லாண்டுகள் இருந்தேன். அங்ஙனம் இருந்த காலம் முழுவதும் சிவஞானப் பேரொளியில்தான் இருந்தேன். அது தேவராலும் வணங்கப்படும் எங்கள் நந்தி பெருமானது திருவடி நிழலேயன்றி வேறில்லை.

****************************************************

பாடல் எண் : 20

பின்னைநின் றென்னே பிறவி பெறுவது

முன்னைநன் றாக முயல்தவம் செய்திலர்

என்னைநன் றாக இறைவன் படைத்தனன்

தன்னைநன் றாகத் தமிழ்செய்யு மாறே.

பொழிப்புரை :  முற்பிறப்பில் நன்கு முயல்கின்ற தவத்தைச் செய்யாதவர், பின்னை நற்பிறவியைப் பெறுதல் எவ்வாறு கூடும்! கூடாது. ஆகவே நான்செய்த தவம் காரணமாக இறைவன் என்னைத் தன்னைத் தமிழ்மொழியால் நன்றாகப் பாடும் வண்ணம் செவ்விய முறையால் படைத்தான்.

**************************************************

பாடல் எண் : 21

ஞானத் தலைவிதன் நந்தி நகர்புக்கு

ஊனமில் ஒன்பது கோடி யுகந்தன்னுள்

ஞானப்பா லாட்டி நாதனை அர்ச்சித்து

நானும் இருந்தேன்நற் போதியின் கீழே.

பொழிப்புரை : பொழிப்புரை எழுதவில்லை

****************************************************

பாடல் எண் : 22

செல்கின்ற வாறறி சிவமுனி சித்தசன்

வெல்கின்ற ஞானத்து மிக்கோர் முனிவராய்ப்

பல்கின்ற தேவர் அசுரர் நரர்தம்பால்

ஒல்கின்ற வான்வழி யூடுவந் தேனே.

பொழிப்புரை : பொழிப்புரை எழுதவில்லை

****************************************************

பாடல் எண் : 23

சித்தத்தின் உள்ளே சிறக்கின்ற நூல்களில்

உத்தம மாகவே ஓதிய வேதத்தின்

ஒத்த உடலையும் உள்நின்ற உற்பத்தி

அத்தன் எனக்கிங் கருளால் அளித்ததே.

பொழிப்புரை : மக்களுடைய உள்ளத்தில் சிறந்து நிற்கின்ற நூல்கள் பலவற்றிலும் தலையானதாகச் சொல்லப்படுகின்ற வேதத்தைச் சொல்லுதற்கு ஏற்ற உடம்பையும், உள்ளக்கருத்தையும் எனக்கு இங்கு இறைவன் அளித்தது, தனது அருள் காரணமாகவாம்.

****************************************************

பாடல் எண் : 24

நான்பெற்ற இன்பம் பெறுகஇவ் வையகம்

வான்பற்றி நின்ற மறைப்பொருள் சொல்லிடின்

ஊன்பற்றி நின்ற உணர்வுறும் மந்திரம்

தான்பற்றப் பற்றத் தலைப்படுந் தானே.

பொழிப்புரை :  பரவெளியைப் பற்றிநிற்கின்ற வேதப்பொருளை உள்ளவாறு உணர்ந்து சொன்னால் அதுவே, `உடம்பைப் பற்றி நிற்கின்ற உயிருணர்வில் நிலைத்துநிற்கும் மந்திரம்` எனப்படும். அம்மந்திரத்தை இடையறாது உணர உணரப் பேரின்பம் கிடைப்பதாம். அவ்வாற்றால் நான்பெற்ற இன்பத்தை, இவ்வுலகமும் பெறுவதாக.

****************************************************

பாடல் எண் : 25

பிறப்பிலி நாதனைப் பேர்நந்தி தன்னைச்

சிறப்பொடு வானவர் சென்றுகை கூப்பி

மறப்பிலர் நெஞ்சினுள் மந்திர மாலை

உறைப்பொடுங் கூடிநின் றோதலு மாமே.

பொழிப்புரை : தேவர் பலரும், பிறப்பில்லாத முதல்வனும், `நந்தி` என்னும் பெயருடையவனும் ஆகிய சிவபெருமானைத் தூய்மையுடன் சென்று கைதொழுது இம் `மந்திரமாலை` நூலை மறவாது மனத்துட் கொள்வர். ஆகவே, நீவிரும் இதனை உறுதியாக நின்று ஓதுதல் வேண்டும்.

****************************************************

பாடல் எண் : 26

அங்கி மிகாமைவைத் தான்உடல் வைத்தான்

எங்கும் மிகாமைவைத் தான்உல கேழையும்

தங்கி மிகாமைவைத் தான்தமிழ்ச் சாத்திரம்

பொங்கி மிகாமைவைத் தான்பொருள் தானுமே.  

பொழிப்புரை :  உடம்பைப் படைத்த இறைவன், அதனுள் வேண்டும் அளவிற்கே நெருப்பை அமைத்துள்ளான். நிலவுலகைப் படைத்த அவன் அளவின்றி எங்கும் பரந்து கிடப்பப் படையாது, ஏழென்னும் அளவிற்படவே படைத்தான். அவ்வாறே தமிழ் நூல்களையும் கற்பாரின்றி வீணே கிடக்க வையாது, அளவாக வைத்தான். பொருளையும் அவற்றால் மிகைபடாது இன்றியமையாத அளவிலே புலப்பட வைத்தான்.

****************************************************

பாடல் எண் : 27

ஞேயத்தை ஞானத்தை ஞாதுரு வத்தினை

மாயத்தை மாமாயை தன்னில் வரும்பரை

ஆயத்தை அச்சிவன் றன்னை அகோசர

வீயத்தை முற்றும் விளக்கியிட் டேனே.

பொழிப்புரை :இம்மூவாயிரம் பாட்டுக்களிலே, `அறியப்படும் பொருள், அறிவு, அறிபவன், அசுத்தமாயா காரியம், சுத்தமாயா காரியம், அனைத்திற்கும் மேலான பரம்பொருளாகிய சிவன் என்று சொல்லப்படுகின்ற வாக்கு மனங்கட்கு எட்டாத முதல்கள் ஆகிய அனைத்தின் இயல்பையும் முற்றக் கூறுவேன்.

****************************************************

பாடல் எண் : 28

விளக்கிப் பரமாகும் மெய்ஞ்ஞானச் சோதி

அளப்பில் பெருமையன் ஆனந்த நந்தி

துளக்கறும் ஆனந்தக் கூத்தன்சொற் போந்து

வளப்பிற் கயிலை வழியில்வந் தேனே.

பொழிப்புரை :  இவை அனைத்தையும் விளக்கிச் சிவபெருமானது உபதேச முறையில் நின்று, `திருக்கயிலாய பரம்பரையில் வந்த ஆசிரியன்` என்னும் பேற்றைப் பெற்றவனாவேன்.

****************************************************

பாடல் எண் : 29

நந்தி அருளாலே மூலனை நாடிப்பின்

நந்தி அருளாலே சதாசிவ னாயினேன்

நந்தி அருளால்மெய்ஞ் ஞானத்துள் நண்ணினேன்

நந்தி அருளாலே நான்இருந் தேனே.

பொழிப்புரை :  சிவபெருமானது திருவருளால் மூலனது உடலைப் பற்றி நின்றபின், அவனது திருவருளாலே ஆகமத்தைப் பாடும் நிலையை அடைந்தேன். அந்நிலையில் அவன் அருளால் நிட்டையும் பெற்றுச் சீவன் முத்தி நிலையில் பல்லாண்டுகள் இருக்கின்றேன்.

****************************************************

பாடல் எண் : 30

இருக்கில் இருக்கும் எண்ணிலி கோடி

அருக்கிய மூலத்துள் அங்கே இருக்கும்

அருக்கனும் சோமனும் ஆரழல் வீச

உருக்கி யுரோமம் ஒளிவிடுந் தானே.

பொழிப்புரை :  பல்லாண்டுகள் ஓர் உடம்பிலே இருத்தல் கூடுமோ? உடம்பு தளர்ச்சியுற்று அழிந்தொழியாதோ எனில் மறைவிடமாகிய மூலாதாரத்துள், எழாது கிடக்கின்ற அரிய நெருப்பை, `சூரியகலை. சந்திரகலை` என்னும் இருகாற்றும் அடங்கி நின்று மூட்டி வளர்க்கும்படி இருந்தால், உடம்பு நெடுங்காலம் தளர்வின்றி இருக்கும்; உரோமமும் வெளிறாது கறுத்து அழகுற்று விளங்கும்.

***************************************************

பாடல் எண் : 31

பிதற்றுகின் றேன்என்றும் பேர்நந்தி தன்னை

இயற்றுவன் நெஞ்சத் திரவும் பகலும்

உயற்றுவன் ஓங்கொளி வண்ணன்எம் மானை

இயற்றிகழ் சோதி இறைவனும் ஆமே.

 

பொழிப்புரை :  இவ்வாறிருக்கின்ற நிலையில் நான் இரவும் பகலும் சிவபிரானது பெயரையே பிதற்றுவேன். நெஞ்சில் நினைப்பேன்; காயத்தால் அவனை வழிபடுவேன். அதனால், விளக்க விளங்குகின்ற என் அறிவும், இயல்பாய் விளங்குகின்ற சிவனது அறிவேயாய்த் திகழும்.

 

****************************************************

பாடல் எண் : 32

ஆர்அறி வார்எங்கள் அண்ணல் பெருமையை

ஆர்அறி வார்அவ் வகலமும் நீளமும்

பேர்அறி யாத பெருஞ்சுடர் ஒன்றதின்

வேர்அறி யாமை விளம்புகின் றேனே.

பொழிப்புரை : எங்கள் சிவபெருமானது திருவருளின் பெருமையை முற்ற உணர்வோர் யாவர்! அவனது பரப்பைத்தான் யாவர் உணரவல்லார்! சொல்லுக்கு அகப்படாத பேரறிவுப் பொருள் தன்னோடு ஒப்பது பிறிதொன்றில்லதாய் உளது. அதனது மெய்ந்நிலையை அறியாமலே நான் பலரும் அறியக்கூறத் தொடங்கினேன்.

****************************************************

பாடல் எண் : 33

பாடவல் லார்நெறி பாடஅறிகி லேன்

ஆடவல் லார்நெறி ஆடஅறிகி லேன்

நாடவல் லார்நெறி நாடஅறிகி லேன்

தேடவல் லார்நெறி தேடகில் லேனே..

பொழிப்புரை : இயல், இசை, நாடகம் என்னும் முத்தமிழுள் ஒன்றையும் நெறிப்பட அறிகிலேன். அளவை நூல் முறையால் ஆராயவும் வல்லனல்லேன். பேரன்பினால் இறைவனையே தேடி அலையும் நிலைமையும் இல்லேன்.

****************************************************

பாடல் எண் : 34

மன்னிய வாய்மொழி யாலும் மதித்தவர்

இன்னிசை உள்ளே எழுகின்ற ஈசனைப்

பின்னை உலகம் படைத்த பிரமனும்

உன்னும் அவனை உணரலும் ஆமே.

பொழிப்புரை :   தன்னை அறிகின்றவரது உள்ளத்தில் வீணையுள் இனிய இசை போல மெல்ல எழுகின்றவனும், உலகத்தைப் படைத்த பிரமனாலும் தியானிக்கப் படுகின்றவனும் ஆகிய இறைவனது பெருமையை, நிலைபெற்ற மெய்ந்நூல் வழியாகவும் சிறிது உணர்தல் கூடும்.

****************************************************

பாடல் எண் : 35

தத்துவ ஞானம் உரைத்தது தாழ்வரை

முத்திக் கிருந்த முனிவருந் தேவரும்

ஒத்துடன் வேறாய் இருந்து துதிசெயும்

பத்திமை யால்இப் பயன்அறி யாரே.

பொழிப்புரை :  மன்னிய வாய் மொழியாகிய சிவாகமங்கள், வீடு பேற்றை அடைவதற்கு விரும்பியிருந்த முனிவரும், தேவரும் கருத்தொருமை கொண்டு உலகப் பயன் விரும்பும் மக்களை விடுத்துத் தனி இடத்திலிருந்து வேண்டிக் கொண்ட அன்பு காரணமாக இறைவன் உண்மை ஞானத்தைக் கயிலைத் தாழ்வரைக்கண் இருந்து உணர்த்தியருளிய நூல்களாம். பக்குவம் இல்லாதோர் இவ்வுண்மையை அறிய மாட்டார்.

****************************************************

பாடல் எண் : 36

மூலன் உரைசெய்த மூவா யிரந்தமிழ்

ஞாலம் அறியவே நந்தி அருளது

காலை எழுந்து கருத்தறிந் தோதிடின்

ஞாலத் தலைவனை நண்ணலும் ஆமே..  

பொழிப்புரை : மூலன் பாடிய மூவாயிரம் பாடலையுடைய இத்தமிழ் நூல் நந்தி பெருமானது அருள் உணர்த்திய பொருளை உடையதே. அதனால், நாள்தோறும் இதனைப் பொருளுணர்ந்து ஓதுவோர் முதற் கடவுளாகிய சிவபெருமானை அடைவர்.

****************************************************

பாடல் எண் : 37

வைத்த பரிசே வகைவகை நன்னூலின்

முத்தி முடிவிது மூவா யிரத்திலே

புத்திசெய் பூர்வத்து மூவா யிரம்பொது

வைத்த சிறப்புத் தரும்இவை தானே..

 

பொழிப்புரை : பொழிப்புரை எழுதவில்லை. குறிப்புரை : இப்பாட்டுக்கள் பின்வந்தோர் செய்தவை. இவை முறையே `முத்தி சாதனமாகிய இந்நூற்கு முதற்கண் உள்ள இப் பாட்டுக்கள் பாயிரம்` என்பதும், `திருமூலரது முதல் மடத்தினின்றும் அவர் மாணாக்கர் எழுவரது கிளைமடங்கள் தோன்றின; அவை அனைத்திற்கும் நூல் இத்திருமந்திரம்; இஃது ஒன்பது தந்திரங்களையும் உடையது` என்பதும், `திருமூலர் மாணாக்கர் எழுவருள், `காலாக்கினி` என்பவரது மரபு, அகோரர், திருமாளிகைத் தேவர், நாதாந்தர், பரமானந்தர் போக தேவர், மூலர் என்னும் முறையில் தொடர்ந்து விளங்கிற்று` என்பதும் கூறுவன. இறுதிக்கண் சொல்லப்பட்ட `மூலர்` என்பவர்தம் மாணாக்கரே இப்பாட்டுக்களைச் செய்தார் போலும்! அல்லது முதல் இரண்டை முன்னவருள் சிலர் செய்திருத்தலும் கூடுவதே.

****************************************************

பாடல் எண் : 38

வந்த மடம்ஏழு மன்னும்சன் மார்க்கத்தின்

முந்தி உதிக்கின்ற மூலன் மடவரைத்

தந்திரம் ஒன்பது சார்வுமூ வாயிரம்

சுந்தர ஆகமச் சொல்மொழிந் தானே.

பொழிப்புரை : பொழிப்புரை எழுதவில்லை. குறிப்புரை : இப்பாட்டுக்கள் பின்வந்தோர் செய்தவை. இவை முறையே `முத்தி சாதனமாகிய இந்நூற்கு முதற்கண் உள்ள இப் பாட்டுக்கள் பாயிரம்` என்பதும், `திருமூலரது முதல் மடத்தினின்றும் அவர் மாணாக்கர் எழுவரது கிளைமடங்கள் தோன்றின; அவை அனைத்திற்கும் நூல் இத்திருமந்திரம்; இஃது ஒன்பது தந்திரங்களையும் உடையது` என்பதும், `திருமூலர் மாணாக்கர் எழுவருள், `காலாக்கினி` என்பவரது மரபு, அகோரர், திருமாளிகைத் தேவர், நாதாந்தர், பரமானந்தர் போக தேவர், மூலர் என்னும் முறையில் தொடர்ந்து விளங்கிற்று` என்பதும் கூறுவன. இறுதிக்கண் சொல்லப்பட்ட `மூலர்` என்பவர்தம் மாணாக்கரே இப்பாட்டுக்களைச் செய்தார் போலும்! அல்லது முதல் இரண்டை முன்னவருள் சிலர் செய்திருத்தலும் கூடுவதே. 

****************************************************

பாடல் எண் : 39

கலந்தருள் காலாங்கர் தம்பால் அகோரர்

நலந்தரு மாளிகைத் தேவர்நா தாந்தர்

புலங்கொள் பரமானந் தர்போக தேவர்

நிலந்திகழ் மூலர் நிராமயத் தோரே.

பொழிப்புரை :   பொழிப்புரை எழுதவில்லை. குறிப்புரை : இப்பாட்டுக்கள் பின்வந்தோர் செய்தவை. இவை முறையே `முத்தி சாதனமாகிய இந்நூற்கு முதற்கண் உள்ள இப்பாட்டுக்கள் பாயிரம்` என்பதும், `திருமூலரது முதல் மடத்தினின்றும் அவர் மாணாக்கர் எழுவரது கிளைமடங்கள் தோன்றின; அவை அனைத்திற்கும் நூல் இத்திருமந்திரம்; இஃது ஒன்பது தந்திரங்களையும் உடையது` என்பதும், `திருமூலர் மாணாக்கர் எழுவருள், `காலாக்கினி` என்பவரது மரபு, அகோரர், திருமாளிகைத் தேவர், நாதாந்தர், பரமானந்தர் போகதேவர், மூலர் என்னும் முறையில் தொடர்ந்து விளங்கிற்று` என்பதும் கூறுவன. இறுதிக்கண் சொல்லப்பட்ட `மூலர்` என்பவர்தம் மாணாக்கரே இப்பாட்டுக்களைச் செய்தார் போலும்! அல்லது முதல் இரண்டை முன்னவருள் சிலர் செய்திருத்தலும் கூடுவதே.

****************************************************

இன்னிலை

இது நான்கு பகுதிகளைக் கொண்டது. இந் நூலைச் செய்தவர் பொய்கையார்.

"திரு. பொய்கையார் இன்னிலை. திரு வ. உ., சிதம்பரம் பிள்ளையவர்கள் விருத்தியுரையுடன் தில்லையாடி த. வேதியப் பிள்ளையால் பதிப்பிக்கப் பெற்றது. இரண்டாம் பதிப்பு. அம்பா சமுத்திரம் அகஸ்தியர் அச்சுக்கூடம் விபவ வருஷம்" என்று முன்பக்கம் எழுதப்பட்டுள்ளது. இப்புத்தகத்தில் "முன்னுரை" "ஆசிரியர்". "உரைப்பாயிரம்," "இரண்டாம் பதிப்புரை" ஆகிய நான்கும் வ. உ. சி அவர்களே வரைந்திருக்கின்றனர். பதினெண் கீழ்க்கணக்கில் ஒன்று "இன்னிலை" தான் என்பதற்கும் அதனை இயற்றியவர் பொய்கையார் என்பதற்கும் இது சிறந்த நூல் என்பதற்கும் பல காரணங்காட்டி விளக்குகிறார். இந்நூல் அவர்கள் கைக்குக் கிடைத்த விதம் அப் புத்தகத்தில் உள்ளபடி இங்கு வரைகின்றேன் அறிக. இன்னிலை'ஆசிரியர்' என்ற தலைப்பில் உள்ளது இது.

"இந்நூலினது ஏட்டுப் பிரதியின் முதல் ஏட்டுத் தொடக்கத்தில் மதுரையாசிரியரால் தொகுக்கப்பட்ட இன்னிலை நாற்பத்தைந்து நன்றாக என்னும் சொற்களும், அம் முதலேட்டின் முடிவில் திருமேனிக் கவிராயன் எழுதி வரும் இன்னிலை நாற்பத்தைந்து நன்றாக என்னுஞ் சொற்களும், அவ்வேட்டுப் பிரதியின் கடைசி ஏட்டு முடிவில் பொய்கையார் பாடிய இன்னிலை முற்றிற்று என்னும் சொற்களும், எழுதப்பட்டுள்ளன. இந்நூலின் ஏட்டுப் பிரதியை எழுதிய திருமேனி இரத்தினக் கவிராயரவர்கள் செந்தமிழ்ப் புலமையும் சீரிய ஒழுக்கமும் தெய்வ பக்தியுஞ் சிறந்து விளங்கியவர்கள். இந்நூலின் ஏட்டுப் பிரதியை அளித்த ஸ்ரீமான் மலையையாப் பிள்ளையவர்கள் அக்கவிராயவர்களின் ஏடுகளை யெல்லாம் போற்றி வைத்திருக்கும் அவர்களுடைய சந்ததியார்களின் தலைவராய் விளங்கியவர்கள். பொய்கையார் என்பவர் இன்னிலை என்னும் நூலை இயற்றிற்றிலர் என்றாவது, அந்நூலை வேறு யாரேனும் இயற்றினரென்றாவது நாம் கேள்விப்படவில்லை. ஆதலால் இன்னிலை என்பது இந்நூலே என்றும் இந்நூலை இயற்றியவர் பொய்கையாரே யென்றும் நாம் கொள்ளலாம்" என்பது, இன்னிலை முதலிற் பதித்ததும் இரண்டாவது பதித்ததும் வ.உ.சி அவர்களே என்பதும், ஏட்டுப் பிரதியும் ஒன்றே என்பதும், அது மலையையாப் பிள்ளையவர்கள் அளித்தனர் என்பதும், மதுரையாசிரியரால் தொகுக்கப்பட்ட இன்னிலை நாற்பத்தைந்து, திருமேனிக் கவிராயன் எழுதி வரும் இன்னிலை நாற்பத்தைந்து, பொய்கையார் பாடிய இன்னிலை முற்றிற்று என அவ்வேட்டின் முதலிலும் முடிவிலும் எழுதப்பட்டிருந்தன என்பதும் நாம் அறிகின்றோம். உரையாசிரியர்களில் இன்னார், இந்நூற்கவிகளை மேற்கோள் காட்டி, இன்னிலையில் உள்ளது என்று குறிப்புக் காட்டியுள்ளனர், என்பதற்கு ஆதாரம் ஒன்று மின்று, வ. உ. சி அவர்களும் சான்று காட்டினாரல்லர். உரையாசிரியர் சிலர் மேற்கோளாக இன்னிலையிலுள்ள கவிகளை எடுத்தாண்டனர் என்று வ. உ. சி. அவர்கள் கூறியதை ஆராய்ந்தால் வியப்பு விளைகின்றது. தொல்காப்பியம், பொருளதிகாரம், களவியல், 23 ஆம் சூத்திரம் இளம்பூரணருரை, கற்பியல், 5 ஆம் சூத்திரவுரை 12 ஆம் சூத்திரவுரை ஆகிய இடங்களைச் சுட்டி இன்னிலை நூலில் 2, 37, 29, 32, 35 எண்ணுடைய ஐந்து பாடல்களும் வந்துள்ளன என விளக்கினர். இளம் பூரணத்தைநோக்க அவற்றுள் ஒன்றேனும் வந்திலது. முந்தின பதிப்புக்களில் இருந்து பின்னர் அவை விடுபட்டனவோ என ஐயுறும் நிலையிலுள்ளது. தொல்காப்பியம் செய்யுளியல் 113 ஆம் சூத்திரம் பேராசிரியருரையில் அவர்கள் கூறியவாறே இன்னிலை 5 ஆம் செய்யுள் மேற் கோளாக வந்துள்ளது. யாப்பருங்கலவிருத்தி யுரையாசிரியரும் இன்னிலை 2 ஆம் செய்யுளை மேற்கோளாகக் காட்டியுள்ளார். ஆயினும் அக்கவிகள் இன்னிலை என்ற நூற் கவிகள் தாம் என்பதற்குச் சான்று தோன்றும் வகை ஆங்கில்லை. பதினெண் கீழ்க்கணக்கு நூல்களுள் ஒன்றாக இன்னிலை வந்த வழி இந்த வழி என்றுணர்க. இனிக் கைந்நிலை வந்த வழி காண்போம்.

கடவுள் வாழ்த்து

வேலன் தரீஇய விரிசடைப் பெம்மான் வாலிழை பாகத்து அமரிய கொழுவேல் கூற்றம் கதழ்ந்தெறி கொன்றையன் கூட்டா உலகம் கெழீஇய மலிந்தே.
- பாரதம் பாடிய பெருந்தேவனார்.

முருகனைப் பயந்த விரிந்த சடையையுடைய பெருமானும், மழுவாயுதத்தையுடைய இயமனைச் சினந்து கொன்ற கொன்றைமாலை புனைந்த வரும் (ஆகிய சிவபெருமான்), இடப்பாகத்தில் உமை:அமர்ந்திருப்ப, (அதனால்) துணையாக எல்லாவுலகங்களும் பெருகி விளங்கின.

கருத்து : சிவபெருமான் ஓர்பாகத்தில் உமையையமர்ந் திருப்ப எல்லாவுலகங்களும் விளங்கினவாதலால் அச்சிவபெருமானை வணங்குவோம்.

நூல்

1. அறப்பால்

அன்று அமரில் சொற்ற அறவுரை வீழ் தீக்கழுது மன்றுயர்ந்து போந்த வகை தேர்மின் - பொன்றா அறம் அறிந்தோன் கண்ட அறம் பொருள் கேட்டல்லல் மறமொறுக்க வாய்த்த வழக்கு.

1

முற்காலத்தில், பாரதப்போரில் (கண்ணன் அருச்சுனற்குக் கூறிய கீதையாகிய) அறவுரையை விரும்பிக்கேட்ட கொடிய பேயானது, (அறிவால்) உயர்வுற்று ஆன்றோரவையைப் போய்ச்சேர்ந்த வகையை ஆராய்வீர், அழியாத தருமங்களையுணர்ந்தோன் அறிந்து கூறிய அறநூலினையும் பொருள் நூலினையும் (நீங்கள்) கேட்டு, துன்பத்தை விளைக்கும் பாவங்களை நீக்குக, பொருந்திய நன்னெறி இதுவேயாம்.

கருத்து : கொடிய பேயும் அறவுரை கேட்டுயர்ந்தது; ஆதலால் மக்களாகிய நீங்களும் ஆன்றோரறவுரை கேட்டுப் பாவம் நீக்கி வாழ்க.

பொருள் விழைவார் போற்றார் உடல்நலம் நம்மை அருள் விழைவார் அதே முழுஎவ்வம் பாய்நீல் இருள் இழையார் வீழ்வார் மேல் பால் ஆக்கார் ஆமாறு அருள்இழையார் தாமும் அது.

2

செல்வப்பொருளைச்சேர்க்க விரும்புவோர் தம் உடல்நலத்தைப் பேணார், நம் இறைவனருளைப் பெற விரும்புவோர் இயற்கையும் அதுவேயாம், துன்ப முழுவதும் பரவுதற்கு ஏதுவாய நீல நிறமான இருண்டவளையலை யணிந்த மங்கையரின்பத்தை விரும்பியவர், முத்திக்குரிய செயல்கள் ஒன்றும் செய்யார், தம்மாலியன்றவாறு பிறவுயிர்கள் மேல் அருள் புரியாதவர் நிலைமையும் அதுவேயாம்.

கருத்து : பொருளை விரும்புவோரும் இறைவனருளை விரும்புவோரும் உடல் நலம் பேணாமல் எப்போதும் உழைப்பார். மாதர் சிற்றின்பத்தை விரும்புவோரும் பிறவுயிர் மேல் அருள் புரியாதவரும் முத்திக்குரிய செயல் புரியார்.

கோலப் புறவில் குரல்கூவிப் புள்சிமிழ்த்தோன் காலில் தளைபரப்பச் சீர்ஒலிக்கும் - மாலின் விரிநிழல் தாம் எய்தார் தீப்பழுவத்து உய்ப்பர் உரிமை இவண்ஓரா தார்.

3

அழகிய புறாவின் குரல் போலத்தான் கூவியழைத்து அப்புறவாகிய பறவையைப் பிடித்துக் கூட்டிலடைத்தவன், (மறுபிறப்பில் அவனுடைய) காலில் விலங்கு பூட்ட (சிறையிலடைக்க) தன் நிலைமையைக்குறித்துப் புலம்புவன், இவ்வுலகில் தாம் செய்ய வேண்டிய கடமைகளை அறியாதவர், திருமாலின் திருவடியின் விரிந்த நிழலையடைவதற்குரிய செயல் புரியார், கொடிய நரகம் என்ற கானகத்தில் தம்மைச் செலுத்துதற்குரிய பாவச் செயல்களைச் செய்வார்.

கருத்து : தாம் செய்யுங் கடமையறியாத மாந்தர் பாவம் பல புரிந்து நரகத்துன்பத்தையடைவர். திருமாலின் திருவடியைச் சேர்தற்குரிய அறவினையைப் புரிவதே மாந்தர் கடமையாம்.

கழிவிரக்கம் கொள்ளார் கதழ் வாளார் வேர்த்துப் பழிமுறுகக் கோடார் பயன் பேர்த்து - அழிமுதலை இல்லம் கொண்டு ஆக்கார் இடும்பைத் தளை தணப்பர் நல்லறனை நாளணி கொள்வார்.

4

தம்மிடமிருந்து நீங்கிய பொருள்களைக் குறித்து வருந்தாதவரும், சினத்தைமேற்கொள்ளாதவரும், வெகுண்டு பழி மிகுதியாகும்படி அதற்குரிய செயல்களைச் செய்யாதவரும், அறப்பயனை நீக்கிக் கெடுக்கும் முதற் பொருளைத் தமது மனையிற் கொண்டுபோய்ச் சேர்த்துச் செல்வத்தைப் பெருக்காத வரும் (ஆகிய அறிஞர்) துன்பமாகிய கட்டினை யறுப்பார்,

கருத்து : கழிந்த பொருட்கு இரங்காதவர், சினங்கொள்ளாதவர், பழிச்செயல் புரியாதவர், பாவத்தால் பொருள் ஈட்டாதவர் ஆகிய இவரே துன்பத்தின் நீங்கி அறம்புரியும் அறிஞராவர்.

திரைத்த விரிக்கின் திரைப்பின் நாவாய்போல் உரைத்த உரையதனைக் கேட்டும் - உரைத்த பயன்தவா செய்வார் சிலர்ஏதம் நெஞ்சத்து இயன்றவா செய்வார் பலர்.

5

சுருட்டிய பாய்களை விரித்தால். விரித்தபாய்களைச் சுருட்டினால். கப்பல் (மாலுமி குறித்த இடத்திற்குச் செல்வது) போலவும், (அவர்) கூறிய அறிவுரையின் பயன் கெடாமல் நல் வினைகளைச் செய்வார் சிலரே (உள்ளனர்) , தம்மனம் போன போக்காக (தீவினைகளைச்) செய்வார் பலர் (உள்ளனர்) .

கருத்து : அறவுரைகேட்டும் பலர் நன்னெறி யொழுகாது தீயவழியிற் செல்கின்றனரே இதுமிகவும் வருந்தத்தக்கது. எல்லாரும் நல்வாழ்வு வாழப் பழக வேண்டும்.

அம்மை இழைத்த தலைப்பட்டு அழிவாயா இம்மையும் கொண்டுறுத்தும் ஈர்ம் பெயலாம் - மும்மை உணர்ந்தால் திருவத்தர் ஓரார் உழண்டைத் தளைப்படுவர் தட்பம் தெறார்.

6

முற்பிறப்பிற் செய்த வினைகள் (அப்பிறப்பிலேயே செய்தவனை) சென்றடைந்து (பயன்களை நல்கி) கெட்டுப்போதலைப் பொருந்தா (முற்பிறப்பிற் செய்த வினைப்பயனை இப்பிறப்பிலடைய வேண்டும். இப்பிறப்பிற் செய்யும் வினைப்பயனை இனி வரும் பிறப்பில் அடையவேண்டும், அறியாதவர் துன்பத்தின் மயங்கி நிற்பார்; பாசங்களை யறுக்கமாட்டார்.

கருத்து : மறுபிறவியுண்டு; நல்வினை தீவினைப்பயன் நம்மை வந்து சேரும் என்று முக்காலங்களையும் அறியும் சான்றோரே பிறவியை நீக்கி முத்தியடைவர்.

தாம்ஈட்டு அருவினைகள் தண்டா உடம்பு ஒன்ற நாம்ஈட்டு ஒறுக்கொணா ஞாங்கர்அடித் தீம்பால் பிதுக்கப் பெயல்போல் பிறப்பறுப்புப் போகா கதுப்போடு இறுத்தல் கடன்.

7

தாமே புரிந்து சேர்த்த அருமையான நல்வினை தீவினைகள் செய்தவர்களை விட்டு நீங்கமாட்டா. உடம்புடன் பொருந்தியிருக்க நம்மால் வினைகளை மீண்டும் நீக்க முடியா; உள்ளிடத்திலுள்ள இனிய பாலானது பிதுக்கப் பிதுக்க வெளி வருவதுபோல, பிறப்பு இறப்பு போகா பிறவியும் சாவும் அடுத்தடுத்து வரும்; மூட்டொடு அப்பிறவியைக் கெடுப்பதுவே மக்கள் கடமையாகும்.

கருத்து : அவரவர் செய்தவினைகள் அவரவரை விட்டு நீங்கா. செய்தவர்களாலும் திரும்பவும் அவற்றை நீக்கமுடியா. வினையுள்ளவரையும் பிறவியும் ஒழியாது. ஆதலால் வினையைக் கெடுத்துப் பிறவியை நீக்குவதே மக்கள் கடமையாம்.

தூயசொல் லாட்டும் துணிவ றியும் துன்பங்கள் தோயக் கலங்காத் துணைவலியும் - பூயல் படுக்குந் திருவத்த னாரே பறிப்பர் அடுக்கு அடிச்சேரா வாறு.

8

தூய்மையான சொற்களைப் பேசுவதும்; (அறிஞர் உண்டென்று ஆய்ந்து) துணிந்தபொருளை யறிவதும், கவலைகள் வந்து பொருந்தியபோது மனங் கலங்காத வளவு வலிமை பெற்றிருப்பதும், (ஆகிய இவற்றை) பொருந்தச் சேர்க்கும் செல்வத்தினையுடையவரே, அடுக்கி வருகின்ற பிறவியிற் சேராதவாறு அதனைக்களைவர்.

கருத்து : தூயசொற் பேசுதலும், செம்பொருட்டுணிவும், துன்பத்திற்குக் கலங்காத மனவலிமையும் உடையவன் பிறவியை நீக்குவான் என்பது.

கடல் முகந்து தீம்பெயலை ஊழ்க்கும் எழிலி மடனுடையார் கோதகற்றி மாண்புறுத்தல் ஏமம் படைத்தாக்கல் பண்பறிந்தோர் சால்பு.

9

மேகமானது, கடலினுள்ள (உப்பு நீரை) முகந்து (நன்னீராக்கி) இனிய மழையாகப் பெய்யும் (அதுபோல) நற்பண்புகளை அறிந்தவரது செயலானது, அறியாமை யுடையவரது குற்றங்களைப் போக்கி நற்குணங்களைப் பொருந்துவித்தலும், (அவர்கட்கு) காவலாக வேண்டியவற்றை உண்டாக்கிப் பெருக்குவதும் ஆம்.

கருத்து : மேகம் கடல் நீரையுண்டு மழை பொழிந்து உலகத்தாரைக் காப்பது போலச் சான்றோர்களும் மக்களிடத்துள்ள அறியாமையை யகற்றி அவரைக்காப்பது கடமையாகும்.

இடிப்பதுஎன்று எண்ணி இறைவானைக் காயார் முடிப்பர் உயிர்எனினும் முன்னார் - கடிப்பக் கன்றமர்ந்து தீம்பால் கலுழுமே நீள் மோத்தை ஒன்ற உணராதார் ஊங்கு.

10

இடிவிழச் செய்கின்றது என்று கருதிச் சிறிதும் மேகத்தை வெறுக்க மாட்டார்; தம் உயிரைப் போக்குவார் (இவர்) என்று தெரிந்தாலும், (அத்தகைய கொடியோர் உயிரை நாம் முதலிற் போக்குவது நலம் என்று (பெரியோர்) கருதமாட்டார். தனது கன்று விரும்பி மடியைக் கடித்தாலும் (தாய்ப்பசு) இனிய பாலினைச் சொரியும், பொருந்த வாழ்வதனை, யறியாத மக்களைப் பார்க்கினும் நீண்ட ஆட்டுக் கடாக்கள் (நல்லனவாம்.)

கருத்து : உதவி செய்பவரிடத்துக் குற்றம் இருப்பினும் பொறுக்கவேண்டும். தமககுத் தீங்கு செய்யினும் அவர்க்குத் தீங்கு செய்ய நினைக்கலாகாது. கூடிவாழ வேண்டும்.

2. பொருட்பால்

உண்மைஓராப் பித்தர் உடைமை மயக்கென்ப வண்மையுற ஊக்கல் ஒருதலையே - கண்ணீர் இருபாலும் தோன்றன்ன ஈர்க்கலார் - போழ்வாள் இருபால் இயங்கலினோடு ஒப்பு.

11

உண்மையையறியாத மயக்க முடையவர் செல்வத்தை மயக்கம் தருவது (சிறந்தது அன்று) என்று கூறுவர். துணிவாகவளம் பொருந்தும்படி தேடுவதற்கு ஊக்கங்கொள்க. கண்ணின் நீர்மை போன்ற இருபக்கமுள்ள அறம் இன்பங்கள் தோன்றுவதாகிய அத்தன்மையுடையது (செல்வம்) வெட்டுவோர்க்கு வெட்டும் வாளாயுதம் இருபாலும் இயங்குவதனோடு ஒப்பாகும் அது.

கருத்து : செல்வம் அறம் இன்பங்களைத் தோன்றுவிக்கும். செல்வ மிருப்பது வீரர்களுக்கு வாளாயுதம் இருப்பது போன்றது. ஆதலாற் செல்வத்தைத் தேட வேண்டியது மக்கள் கடமையாம்.

உடைமைஅறாது ஈட்டல் உறுதுணையாம் யாண்டும் உடைமையராச் சென்றக்கால் ஊர்எல்லாம் சுற்றம் உடைமைக் கோல் இன்றங்குச் சென்றக்கால் சுற்றம் உடையவரும் வேறு படும்.

12

(ஒருநாளும்) நீங்காது செல்வத்தைச் சேர்க்க வேண்டும். அஃது எவ்விடத்தும் மிக்க துணையாகும்; செல்வமுடையவராகி அயலூர்க்குச் சென்றால் சென்றவூரில் உள்ளவர் எல்லாரும் சுற்றத்தாராவார், செல்வமாகிய ஊன்றுகோலின்றி ஆங்குச் சென்றால் சுற்றத்தார் என்ற உரிமையுடையவரும் வேறுபட்டு அயலார் போலாவார்.

கருத்து : செல்வமுடையவரை எல்லாருஞ் சேர்ந்து தம் சுற்றமாகவே கொண்டாடுவர். ஆதலாற் செல்வத்தை இடைவிடாது வருந்திச் சேர்க்கவேண்டும்.

மண்ணீர் உடையார் வழங்கிச் சிறுகாலைத் தண்ணீரார் சாரும் நிலம்சார்வர் - உண்ணீர் அறியின் அருஞ்செவிலி மாண்பொருளே வெண்ணீர்ச் சிறியரையும் ஏர்ப்படுத்தும் செய்.

13

நிலமும் நீர்நிலைகளும் ஆகிய செல்வங்களையுடையவர்; அவற்றை வறியவர்க்குக் கொடுத்து (அறம்புரிந்து) விரைவில், அருட்குணமுடைய ஆன்றோர் எய்தும் மேலுலகத்தினை அடைவர், உண்மைத் தன்மையாய்ந்தால், மாட்சிமையுடைய செல்வப் பொருளே (அந்நற்பண்பு நற்செயல்களை வளர்க்கும்) அருமையான செவிலித்தாயாகும்; (அப்பொருள்) வெள்ளிய தன்மையுடைய சிறியோரையும் பெருமைப் படுத்தும், (ஆதலால் அப்பொருளை) ஈட்டுக.

கருத்து : செல்வமுடையவர்கள் அறம்புரிந்து மேலோர் எய்தும் துறக்கத்தினையும் அடைவர். செல்வமே நற்பண்புகளை வளர்பபது. ஆதலால் நீ செல்வத்தினையே தேடுக.

மெய்வலியும் செல்நிலையும் வாழ்நாளும் தூவொழுக்கும் மெய்யா அளிக்கும் வெறுக்கைஇலார் - வையத்துப் பல்கிளையும் வாடப் பணையணை தோள் சேய்திரங்க ஒல்குஉயிர்நீத்து ஆரும் நரகு.

14

பொருட்செல்வமானது (எல்லார்க்கும்) , உடல்வலியும், தம்வாக்கு எங்குஞ் செல்கின்ற நிலைமையும், நீண்ட வாயுளும், தூயவொழுக்கமும், உண்மையாகக் கொடுக்கும், செல்வமில்லாதவர்கள், இவ்வுலகில், பலசுற்றாத்தாரும் வருந்தும் படியும், மூங்கில் போன்ற தோளுடையவள் ஆகிய மனைவி மக்கள் குறைவாகிய உயிரைப் போக்கி, (மறுமையிலும்) நரகத்திற் சேர்வர்.

கருத்து : ஒருவருக்குச் செல்வமானது உடல்வலி செல்வாக்கு. வாழ்நாள், நல்லொழுக்கம் இவற்றைக் கொடுக்கும், செல்வமில்லாதவர் இம்மையிற் சுற்றம் மனைவி மக்கள் வாடும்படி வாழ்ந்து பின் இறந்து மறுமையில் நரகத்தை யடைவர். ஆதலாற் செல்வத்தைத்தேடுக.

குருட்டுஆயன் நீள்கானம் கோடல் சிவணத் தெருட்டுஆயம் காலத்தால் சேரான் - பொருட்டாகான் நல்லறமும் பேணான் நாரம்இவர்த் தானாம் பொல்லாங்கு உறைவிடாமாம் புல்.

15

(யாவரையும்) தெளிவிக்கின்ற பொருள் வருவாயை, இளமைப்பருவத்திலேயே சேராதவன். கண்குருடாகிய இடையன் நீண்ட கானத்தினை (தன் ஆடுகளை மேய்ப்பதற்கு) இடமாகக் கொள்வதை ஒப்ப, ஒரு பொருளாக மதிக்கப்படான். நல்ல அறங்களையும் செய்ய விரும்பான். மக்கட் கூட்டத்தால் வெறுக்கப்பட்டவனாவன், தீமைகள் யாவும் தங்குவதற்கு இடமாவன். சிறியவன்.

கருத்து : இளமையிற் பொருள் தேடாதவன், குருட்டாயன் காட்டில் ஆடு மேய்த்தது போல வாழ்வில் இடர்ப்பட்டுப் பிறரால் மதிக்கப்படாமல் வாழ்வான்.

முப்பொருள் உண்மை தெளிவான் அருஞ்சீலன் முப்பொருள் உண்மை உடையான் அருமுனிவன் முப்பொருள் உண்மை மடுப்பான் இறையாங்கு முப்பொருள் உண்மைக்கு இறை.

16

(அறம் பொருள் இன்பம் என்ற) மூன்று பொருள்களின் உண்மை இயல்புகளை யுணர்ந்து தெளிந்தவன் அருமையான நல்லொழுக்க முடையவனாவான். அம்மூன்று பொருள்களின் உண்மையறிவுடையவன் அரிய தவ முனிவனாவான். அம்மூன்று பொருள்களின் உண்மையை மனிதர்கட்குக் காட்டி வளர்ப்பவன் அரசனாவான், அம்மூன்று பொருள்களும் மெய்ப் பொருளுக்கு உறைவிடமாம்.

கருத்து : அறம் பொருள் இன்பம் என்ற மூன்று பொருள்களின் இயல்புணர்ந்து தெளிந்தவன் நல்லொழுக்கமுள்ளவன்; அவற்றை அறிந்தவன் முனிவன்; அவற்றை மனிதர்க்குக் காட்டிப் பெருக்குவோன் அரசன். பரம்பொருட்கு இருக்குமிடமும் அவையாம்.

கால்கலத்தால் சேர்பொருளும் கண்ணற்றார் தேர்பொருளும் நாலிரண்டால் கூடும் நலப்பொருளும் - கோல்தாங்கிக் கோடும் அரசிற்கு உரியாமே தொல்புவிக்கீழ் ஆடும் பொருளோடு அணைந்து.

17

வண்டியாலும் கப்பலாலும் வந்து சேர்கின்ற சுங்கப் பொருளும், அறிவில்லாதவர் தேடிய பொருளும், வருவாயில் ஆறிலொரு பங்காகக் கொடுக்கும் நலமான பொருளும், பழைமையான புவிக்குக்கீழ் அசை கின்ற பொருளாகிய புதையலுடன் சேர்ந்து, செங்கோல் தாங்கி நீதி தவறி நடக்கும் அரசுக்கு உரியனவாமோ (உரியனவாகா செங்கோலரசர்க்கே யுரியனவாம்.)

கருத்து : சுங்கப் பொருளும் அறிவில்லார் தேடிய பொருளும், குடிகள் ஆறிலொன்று கொடுக்கும் பொருளும் நிலத்திற் புதைத்த பொருளும் செங்கோலரசர்க்கே சேரும்.

ஆம்போம் வினையாம் அணைவுற்ற பேர்வெறுக்கை ஓம்புஓம்பு எனமறை கூறத் தலைப்பெயலென் ஏம்போம் எனவரைதல் ஈட்டுநெறி தேராமை சாம்போழ்ந்து அலறும் தகைத்து.

18

(பொருள்) முற்பிறப்பிற் செய்த வினை காரணமாக உண்டாகும் பின்பு அழிந்துபோகும், (அப்பொருளுக்கு) சேர்ந்த பெயர் வெறுக்கையாம், ஒழித்துவிடு ஒழித்துவிடு என்று வேதங்கள் கூறவும், அப்பொருளைச் சேர்ப்பது, என்ன காரணம், (பொருளீட்டி) களிப்படையோம் நாம் என்று கூறி அதனை நீக்குவது, பொருள் சேர்த்து இன்பம் துய்க்கும் வழியறியாமையே யாகும், அது இறக்கும்போது வருந்தியழுந் தன்மை யுடையது.

கருத்து : ஆம் போது ஆம் போம்போது போம் என்று எளிதாகச் செல்வத்தைக் கருதி இளமைப் பருவத்தில் தேடாமலிருந்தால் இறக்கும்போது மனைவி மக்களைக் குறித்து வருந்த வேண்டியது நேரிடும்.

பட்டாங்குத் தூயர் பழிச்சற்கு உரியராய் ஒட்டின்று உயர உலகத்தோர் - கட்டளை யாம்வெறுக்கை இன்றி அமையாராம் மையாவின் ஆம்வெறுக்கை நிற்க வுடம்பு.

19

உலகத்துள்ள மக்கள், உண்மையாக, தூய்மையுடையவராகவும் துதிப்பதற்கு உரியவராகவும், ஒப்பில்லாமல் உயர்வதற்கு, செல்வமே உரைகல்லாம், அச் செல்வமில்லாமல் (வேறொன்றாலும் அளப்பதற்கும்) பொருந்தார் ஆம். (செல்வமின்றி) உடல்மட்டும் நின்றால், காட்டுப் பசுவைப்போல வெறுப்பதற்கு உரியதாம்.

கருத்து : உலகத்தில் மக்களையளந்து உயர்வு தாழ்வுகாட்டுவதற்குக் கட்டளைக் கல்லாக இருப்பது செல்வம். செல்வமில்லாதவ ருடம்பு காட்டுப் பசுப்போல வெறுக்கப்படுவதாம்.

3. இன்பப்பால்

அறங்கரை நாவானாம் ஆய்மயிலார் சீரில் அறங்கரையா நாப்பண் அடைவாம் - புறங்கரையாத் திண்மை நிலையின் உயர்புலத்தில் சேர்வாம் ஈண்டு எண்ணிலைக்கு உய்வாய் இது.

20

இன்பத்தின் பகுதியைக் கூறுவது இது. ஐம்புலனுகர்ச்சியிற் சிறந்த இன்பமாவது மங்கையர் காமவின்பமேயாதலின் அதனைக்கூறும் பகுதியாம். மூன்றாவதாக இன்பப்பால் வைக்கப்பட்டுள்ளது.

அறங்கூறும் நாவினால் ஆராய்ந்த மயில்போன்ற மகளிருடன் கூடிவாழும் சிறப்பு (ஒருவனுக்கு) உண்டாகும், இல்லறத்தின் முடிவாக நடுவுலகம் (பொன்னுலகம்) அடைவது கூடும், புறத்தொழுக்கிற் சென்று தளராத வலிமையான நிலையால் உயர்ந்த முத்தியாகிய இடத்திற்குச் சேர்வதும் கூடும், (ஆதலால்) இவ்வுலகத்தில் ஆராய்ந்த நிலைகட்கு எல்லாம் செலுத்துகின்ற வழி, இவ்வழியேயாம்.

கருத்து : இல்லறமே சுவர்க்கத்துச் செல்லுவதற்கும், முத்தியுலகம் அடைவதற்கும் வழியாகும். ஆதலால் இல்லறத்தை நல்லறமாகக்கொள்ளல் வேண்டும் மக்கள் யாவரும்.

துணைஎன்ப காமவிருந்து துய்ப்பார் தோமில் இணைவிழைச்சின் மிக்காகார் ஆகல் - புணைதழீஇக் கூட்டும் கடுமிசையான் கட்டியில் கொண்டற்றால் வேட்டபோழ் தாகும் அணி.

21

காமவின்பமாகிய விருந்துண்பவர் (கணவனும் மனைவியும்) முத்தியுலகஞ் செல்வதற்குத் தக்க துணையாவார் என்று ஆன்றோர் கூறுவர். (அவர்கள்) குற்றமில்லாத புணர்ச்சியின்பத்தின் மிகாதவர்களாகுக. அது புணையாகி அவர்களைத் தழுவி முத்தியிற் சேர்ப்பிக்கும். மணம் புரிந்த போது உண்டாகிய அழகின் தோற்றம், கசப்பு மருந்தினையுண்ணாதவனுக்குக் கருப்புக்கட்டியில் வைத்து ஊட்டினாற்போன்றது.

கருத்து : கணவனும் மனைவியும் முத்தியுலகு செல்வதற்கு வழித்துணையாவார்; காதலிற் கருத்து மிகுதியுஞ் செலுத்தாது வாழ்ந்தால், அது புணைபோலக்கொண்டு போய்ச் சேர்க்கும் மணமுடிப்பது பேரின்ப வாழ்வு குறித்ததுவேயாம்.

ஒப்புயர்வில் வேட்டோன் ஒருநிலைப்பட்டாழ்ந்த செயல் நப்பின்னை ஞாலம் ஒருங்கு அறிக - துப்பாராய்த் தூமலரின் மென்மையுறு தோற்றத்தே வைத்துய்க்க ஏமக் கிழத்தி அறிந்து.

22

ஒப்பில் உயர்வு இல்லாமல் (காதலன் காதலியிருவரும் ஒப்பென்று கருதி) மணந்தவன் ஒரு நிலைமையடைந்து (இன்பத்தில்) ஆழ்ந்திருந்த செய்தியை, நப்பின்னை (வாழ்வால் அறியலாம்) , உலக முழுவதும் அறிந்து கொள்க, மனத்தூய்மையுடையவராய்த் தூய பூவின் மென்மையாகிய தோற்றத்தையே மனதில் வைத்து (இல்லறம்) நடத்துக.

கருத்து : நப்பின்னையும் கண்ணனும் காதலுடன் கூடி இல்லறம் நடாத்தியது போல ஒருவர் தமக்கு வாழ்க்கைத்துணையை யறிந்து 'மணம் புரிந்து' மென்மைத் தன்மையாக இல்லறம் நடத்த வேண்டும்.

பாலை வளர்த்துக் கணங்குழை மாலையுறல் சால்பென்ப கண்கூடாக் காணாய் - தழைகாதல் வாலறிவன் ஆக்க வகையறிக காலத்தால் தோலொடு நாலைந்து அணந்து.

23

பாலகனை வளர்த்து, பெருகிய ஆசையுடன், அழகுடன் நான்கு அல்லது ஐந்து ஆண்டு கூடிய அக்காலத்தில், (பள்ளியில் வைத்து) தூய அறிவுடையவனாக்குவதற்கு வேண்டும் வழியினை அறிந்து செய்க, (அவ்வாறு செய்யின்) திரண்ட காதணிகளையுடைய மங்கையின் இன்பத்தையுறுவது பெருமை என்று சொல்வார் (பெரியோர்) , அவ்வின்பத்தினை நீ கண்ணுக்குத் தோன்றும்படி காண்பாய்.

கருத்து : நல்ல மைந்தனைப் பெற்றெடுத்து வளர்த்துக் கல்வியறிவுடையனாகச் செய்தால் இல்லறத்தில் மனையாளுடன் கூடியவின்பம் பெருமையுடையதாம்.

அழுக்குடம்பு யாத்தசீர் மெல்லியலை ஆணம் முழுக்காட்டி மன்றின்முன் கைத்தாக் - குழீஇக்கூடல் என்னே செறிகாமம் பூட்டும் இயல்மாரன் மன்னரசால் மாண்பூப்பு உலகு.

24

(எலும்பு நரம்பு முதலியவற்றாற்) கட்டப்பட்ட சிறப்புடைய அழுக்குப் பொருந்திய உடலுடைய மங்கையை, பலவகைக் கூட்டுப் பொருள்களைப் பூசி நீராட்டுவித்து (அலங்கரித்து) அவையோர் முன் கைப்பற்றிக் கொண்டுபோய்ப் புணர்தல் என்ன வியப்பு! நெருங்கிய காமத்தை (ஆடவர் மகளிர் என்ற இரு திறத்தார்க்கும்) பூட்டுகின்ற இயல்புடைய மன்மதனுடைய, நிலைபெற்ற அரசாட்சியினால் மண்ணுலகமானது மாண்பாக உண்டாவது.

கருத்து : அழுக்குடம்புடைய பெண்ணை ஒருவன் அலங்கரித்து மணம் புரிந்து வாழ்கிறான். அதனால் உலகம் மேலும் மேலும் பெருகி நிலைத்து நிற்கிறது.

இன்ப இயலோரார் யாணர் விழைகாமம் பொன்னின் அணிமலரின் செவ்விதாம் - தன்மேனி முத்தம் முறுவல் முயக்கொக்கின் அன்னத்தின் பெற்றியரின் என்பெறும் பேறு.

25

காமவின்பத்தின் இலக்கணங்களை யறியார் (சிலர்) , புதுமையாக விரும்பும் காமவின்பம் பொன்னைப்போலவும், அழகிய மலரைப் போலவும் சிறப்புடையதாகும், ஒருவன் தனது உடம்புக்கு முத்துப்போன்ற பற்களையுடையார் புணர்ச்சி இன்பம் கிடைத்தால், அன்னப்பறவையின் இயல்புவாய்ந்த அம்மங்கையராற் பெறும் இன்பத்தினும் வேறு சிறந்த பேறு யாது? (இல்லை) .

கருத்து : காமவின்பத்தின் இயல்பறியார் சிலர் இகழ்ந்து பேசுவர். காமம் பொன்மலர் போல அழகும், இன்பமும் தருவது. காமத்தைப் போலச் சிறந்த பேறு வேறு ஒன்றும் இல்லை.

தூவி நெருஞ்சிக்காய் நீர்முள்ளி தும்பைஅலர் காவியன சேல்கண் குறுந்தொடியார் - ஆவிக்கு இனியர் இணைசேரார் ஈர்ங்கண் மாஞாலத் தனிமைக்கு அவரோர் கரி.

26

அன்னப்பறவையின் சிறகிலுள்ள மயிர்கள் நெருஞ்சிக் காய் முட்களாகவும் தும்பை மலர்கள் நீர் முள்ளியின் முட்களாகவும் தோன்று மெல்லிய அடிகளையும், நீலமலரும் கெண்டை மீனும் போன்ற விழிகளையும் சிறிய வளையலையும் உடைய மகளிர், ஆவிக்கு, (ஆடவரது) உயிர்க்கு இனிமை தருவோராவார்; (அம்மகளிரைத் தமக்கு) இணையாகக் கொண்டு கூடி வாழாதவர்; குளிர்ந்த இடத்தையுடைய பெரிய வுலகத்தில், தனிமை வாழ்வுக்கு அவ்வாடவர் ஒரு சான்றாவர்.

கருத்து : மங்கையரை வாழ்க்கைத் துணையாக மணந்து வாழ்வதே சிறந்த வாழ்வு. அவ்வாழ்வே இன்பந் தருவது. அவரைக் கூடாத வாழ்வு தனிமையுடையது; துன்ப வாழ்வு.

காமம்வீழ் இன்பக் கடலாமே காதலரின் ஏம இருக்கையே தூம்திரையாம் - ஏமத்தீண்டு ஆம்பாலே தோன்றும் அளிஊடலாம்பரலில் தெற்றித் தெறிப்பாம் ஒளி ஒளிபாய் கண்ணே சீர்த் துற்றுகப்பாய்ப் பெற்ற மகவு.

27

காமமானது யாவரும் விரும்புகின்ற இன்பக் கடலாகும், காதலன் காதலி இருவரும் கூடிய இன்பத்தின் இருக்கையே வீசும் அலையாகும், அவ்வின்பத்தினின்று இங்கு உண்டாகும் அன்பே முத்தாகும், அம்முத்தினின்று தெளிந்து எழுகின்ற ஒளியே ஊடலாம், அவ்வொளி பாய்கின்ற இடமே சிறந்து மகிழ்வுடன் பெற்ற குழவிகளாம்.

கருத்து : காமம் கடலாகும்; புணர்ச்சியே அக்கடலிற்றோன்றும் அலையாம்; அன்பு அலையில் வந்த முத்து ஆம்; ஊடல் அம்முத்தின் ஒளியாகும்; மக்கள் அவ்வொளி கூடும் இடமாகும்.

கறங்குபறை காணா உறுஊனைக் காதல் பிறங்கறை நாவாரும் அதே - திறம்இரங்கி ஊடிஉணர் வாரே தாம்இசைவார் பல்காலம் ஈடிலதோர் இன்ப விருந்து.

28

பலியிடும்போது தன் பாலுற்ற ஊனினது சுவையை ஒலிக்கின்ற பறைகள் அறியா, காதலை விளங்கச் சொல்லுகின்ற நாவினையுடையவரும் அப்பறைகள் போலக் காதற் சுவையை யறியார்; (காதலிருவரும்) தன்மையறிந்து மனமிரங்கிப் புலந்து பின் அப்புலவி நீங்கிக் கூடியவரே, ஒப்பற்றதாகிய ஓர் இன்ப விருந்தினைப் பலகாலமும் தாம் நுகர்ந்து சுவையறிபவராவர்.

கருத்து : காதற் சுவையைப் பலர்க்கும் விரித்துப் பேசுவார் எல்லாரும் காமச்சுவையையறியார். காதலர் இருவரும் இயல்பறிந்து பிரிவுக்கிரங்கிப் பின் ஊடியும் கூடியும் போகம் நுகர்ந்தவரே சுவையறிந்தவராவர்.

தோற்றாரே வெல்வர் துணைமிசைவார் கோட்டியானை ஏற்றுக்கழல் தொடியார் மிக்காரை யார்வரைவர் போற்றளி கூடல் கரி.

29

ஆண்யானைத் தந்தத்தாற் செய்த வீரக்கழலும் வளையலும் அணிந்த ஆடவர் மகளிரில், உயர்ந்தவர்களை யார் மணஞ்செய்துகொள்வர் (ஒப்பவரையே மணம்புரிவர்) , (அவ்வாறு ஒத்த) வாழ்க்கைத் துணையாக அமைந்து காமவின்பம் நுகர்வாரில், ஊடலில் தோல்வியடைந்தவரே வென்றவராவர்; அதற்குச் சான்று தோற்றவர் போற்றுவதும் தலையளி செய்வதும் ஆகிய செயல்களேயாம்.

கருத்து : கழல்-ஆடவர்க்குரியது; தொடி-மகளிர்க்குரியது; கழல் தொடியார் எனவே கழலும் தொடியும் அணிந்தவர் என அவ்விருவரையும் குறிப்பாக உணர்த்திற்று. "ஒத்த கிழவனும் கிழத்தியும் காண்ப" என்றும் பிறப்பே குடிமை ஆண்மை, ஆண்டோ, டுருவுநிறுத்த காமவாயில், நிறையேயருளே யுணர்வொடு திருவென, முறையுறக் கிளந்த ஒப்பினது வகையே" என்றும் தொல்காப்பியம் கூறுவதால் "மிக்காரை யார் வரைவர்" என்றார். இருவரும் ஒத்தவராயமைந்தால் அது வாழ்க்கைத் துணையென மதிக்கப்படும் என்பது கருத்து. வாழ்க்கைத் துணையாக மதித்து மணம்புரிந்த காதலர் இருவரினும் "தோற்றாரே வெல்வர் எனக்கொள்க. காதலன், காதலியாகிய இருவரிடத்தும் ஊடல் நிகழ்வதுண்டு. "யானூடத்தானுணர்த்த யானுணராவிட்டதற்பின், தானூட யானுணர்த்தத் தானுணரான்" என்று தலைவி கூறுவது சான்றாம். ஊடியிருந்த தலைவியைத் தலைவன் இன்சொற்கூறி யிரந்து வேண்டுவன், அது போலவே தலைவன் ஊடியிருப்பின் தலைவியும் வேண்டுவள் இருவரும் பின் புலவிநீங்கிக் கூடுவர். இவ்வாறு ஊடல் நிகழ்ந்து பின் கூடுவது மிகவும் இன்பம் பயக்கும் என்பது அறிஞர் கண்டவுண்மை. ஊடியிருந்த இருவரில் ஒருவர்க்குக் காமம் மிகின் அவர் பிணக்கு நீங்கி முதலிற் கூடுதற்கு மனங்கொள்வர். அவரையே தோற்றவர் என்று கொள்க. அவர் புணர்ச்சி விருப்ப மிகவும் உடையர் ஆதலால் அவரே புணர்ச்சிப்போரில் வெல்வார் என்பது குறிப்பு. வள்ளுவரும் "ஊடலிற் றோற்றவர் வென்றா ரதுமன்னும் கூடலிற் காணப்படும்" என்றார். இதனுண்மையாய்க. அவரது தலையளியும் கூடலும் அவர்வென்றமையை யுணர்த்துஞ் சான்றாம் என்பார் "போற்று அளி கூடல் கரி" என்றார்.

காதல் விரிநிலத்து ஆராவகை காணார் சாதல்நன்று என்ப தகைமையோர் - காதலும் ஆக்கி யளித்தழிக்கும் கந்தழியின் பேருருவே நோக்கிலரை நோவது எவன்.

30

பரந்த மண்ணுலகத்தில், காதலின்பம் (எப்போதும்) நிறையாதிருக்கும் விதத்தையறியாதவர்கள்; (காதலின்பத்தைக் கருதி வாழ்வதினும்) சாவதே நல்லது என்று சொல்லுவார்; நற்பண்புடையோரது காதலின்பமும் படைத்துக் காத்துத் துடைக்கும் கடவுளின் பெருமையாகிய வடிவமேயாகும்; (இவ்வுண்மையை) ஆராய்ந்து அறியும் அறிவில்லாதவர்களைக் குறித்து வருந்துவது என்னபயன்.

கருத்து : காமவின்பத்தின் இயல்பு அறியாதவர் இறந்து பேரின்பம் அடைவதே நல்லது என்பார், ஆராய்ந்து பார்த்தால் இச்சிற்றின்பமும் பேரின்பத்திற்கு வழியாகும். ஆதலால் சிற்றின்பத்தினைத் துய்த்து வாழ்வதே நல்லது.

அளகும் அளிநாகைப் பேண அணியார் அழகுஅரிவை வீழ்முயக்கை அண்ணாத் - தளியாளர் பெற்ற பிறக்கெறிந்து புத்தாய பெட்டுழலும் பெற்றியர் பெட்ட கழுது.

31

பெண்பறவைகளும் அன்பினால் இளமையான குஞ்சுகளைப் பேணிவளர்க்கவும், (அதனைக்கண்டும்) நகைநிறைந்த இயற்கையழகுடைய பெண்கள் விருப்பமான புணர்ச்சியின்பத்தைக் கருதாத கோயிலையிடமாகக் கொண்ட துறவிகள்; தாம்பெற்ற பொருள்களைப் புறம்பாக எறிந்துவிட்டுப் புதிதாகிய பொருள்களை விரும்பி உழன்று திரியும் இயல்புடையவராவார்; (அவர்கள் மேலுமேலும் உணவைமட்டும்) விரும்பிய பசாசு ஆவர்.

கருத்து : மங்கையரின்பத்தைக் கருதாத மனமுடைய துறவிகள் பெற்றபொருளை யெறிந்துவிட்டு வேறுபொருள் தேடியுழலும் பித்தர் போன்றவர். பசாசு போன்றவர்கள் என்றுங் கூறலாம்.

4. வீட்டுப்பால்

அ. இல்லியல்

ஒத்த உரிமையளா ஊடற்கு இனியளாக் குற்றம் ஒரூஉம் குணத்தளாக் - கற்றறிஞர்ப் பேணும் தகையளாக் கொண்கண் குறிப்பறிந்து நாணும் தகையளாம் பெண்.

32

(பிறப்பு முதலியவற்றால்) ஒத்த உரிமையுடையவளாகியும், ஊடலில் இனிமையுடையவளாகியும், குற்றங்கள் நீங்கிய நற்குணங்களையுடையவளாகியும், (பலநூல்களையும்) கற்ற அறிவுடையவரைப்பேணும் தன்மையுடையவளாகியும், கணவனுடைய குறிப்பினை அறிந்து (அதற்கியைய) நாணுகின்ற தன்மையுடையவளே பெண் ஆவள்.

கருத்து : ஒத்தவுரிமையும், ஊடலினிமையும், குற்ற நீங்கிய குணமும், கற்றவரைப் பேணும் கருத்தும், கணவன் குறிப்பறிந்து நாணும் பண்பும் உடையவளே இல்லறத்திற்குத் தக்க பெண்ணாவள்.

மனைக்கொளி சேய்நாற் பணியோன் நாரப்புலக்கார் வினைக்கொளியாம் கட்காம் அனலி - முனைக்குஅஞ்சா வீரர் ஒளியாம் மடமே அரிவையர்க்காம் ஏரொளியாம் இல்லுடையான் துப்பு.

33

வீட்டிற்கு விளக்கு மக்கள் ஆவர், நீர் பொருந்திய நிலத்திற்குச் செய்யும் தொழிலுக்கு விளக்கு நான்கு தொழிலும் அறிந்த ழவனேயாவன். விழிகளுக்கு விளக்காவது சூரியனேயாவன், போர் முனைக்கு அஞ்சாத படைவீரர்களே விளக்கு ஆவர், மங்கையருக்கு விளக்கு மடமை யென்னும் பண்பேயாகும், இல்வாழ்வான் வலிமைக்கு விளக்கு ஏருழுதல் என்னுந் தொழிலாம்.

கருத்து : மனைக்கு மக்களும், நிலத்திற்கு உழவனும், கண்ணுக்குக் கதிரவனும், போருக்கு வீரரும், பெண்ணுக்கு மடமையும், இல்வாழ்வானுக்குப் பயிர்த்தொழிலும் சிறப்பைத்தருவனவாம்.

எய்ப்பில்லைப் பாக வருவாயில் ஐந்தொன்றை மெய்ப்பிணி சேய்வரைவில் கூட்டிடுக - கைப்பொருள்வாய் இட்டில்உய் வாய்இடுக்க ஈங்க விழையற்க வட்டல் மனைக்கிழவன் மாண்பு.

34

இடுக்க கைப்பொருள் வருவாய் குறைந்தால் செலவுவழியையும் சுருக்குக, தன்னைப் பெருக்கிக் காட்ட விரும்பற்க, பொருளைத் திரட்டுவதே மனைக்குரிய தலைவன் செயலாகும், இளைத்த பருவத்தில் (கிழப்பருவத்தில்) நுகர்தற்குரிய சேமப்பொருளாகவும், உடற்பிணிக்கு வேண்டும் மருந்துண்டற்குரிய பொருளாகவும், மக்கட்கு மணம் புரியும் செலவிற்குரிய பொருளாகவும்,

கருத்து : வீட்டுக்குரிய தலைவன் பொருளைச் சேர்க்க வேண்டும்; வருவாய் குறைந்தாற் செலவைக் குறைக்கவேண்டும்; ஐந்தில் ஒரு பங்கைச் சேம நிதியாக வைத்திருக்க வேண்டும்; அப்பொருள் மக்கள் மணத்திற்கும் தன் முதுமைப்பருவத்திற்கும் நோய்க்கும் உதவியாகும்.

ஐம்புலத்தோர் நல்குரவோர் ஓம்பித் தலைப்பட்ட செம்பாக நன்மனையைப் பேணிக் - கடாவுய்த்த பைம்புல் நிலைபேணி ஊழ்ப்ப வடுஅடார் ஐம்புலம்ஈர்த் தாரில் தலை.

35

தென்புலத்தார் முதலிய ஐந்து திறத்தாரையும் வறியவரையும் காத்து, தம்மைச்சார்ந்த ஒமுங்காகிய பங்கினால் நல்ல மனைவியைக்காத்து, எருமைக்கடாக்களைச் செலுத்தி யுழுத பசிய புல் நிற்கும் நிலையையுடைய நிலங்களைக் காத்து, சிறக்கும்படி குற்றம் பொருந்தாத வழக்கையுடையவர், ஐம்புலங்களையும் வென்ற முனிவரினும் முதன்மையாவர்.

கருத்து : இல்வாழ்க்கையை முறைப்படி நடத்தி வாழ்பவர் ஐம்புலமடக்கிய முனிவரினும் சிறந்தவர்.

உள்ளவா சேறல்இயைபு எனினும் போம்வாய வெள்ளத் தனசேறல் வேண்டல் - மனைக்கிழவன் நள்அளவில் மிக்காய கால்தொழிலை ஓம்பலே தெள்ளறிஞர் கண்ட நெறி.

36

தன்னிடத்தில் உள்ள பொருளுக்கு ஏற்றவாறு செலவழித்து நடப்பது பொருத்தமென்றாலும், செலவழிக்க வேண்டிய இடத்தில் வெள்ளத்தைப் போலப் பெருக்கமாகச் செலவு செய்து நடப்பதை விரும்பற்க; ஒரு மனைக்குரிமையுடைய தலைவன், விரும்பும் அளவிற்கு மேற்பட்ட அளவுடைய முயற்சியை விலக்குவதே, தெளிந்த அறிவுடையோர் கூறிய வழியாம்.

கருத்து : இல்வாழ்வோர் செல்வத்திற்குத் தக்கவாறு செலவழிக்க வேண்டுமெனினும் அளவுகடந்து செலவழித்தல் ஆகாது; தம்பொருள் அளவிற்கு மேற்பட்ட முயற்சியையும் செய்யக் கருதலாகாது.

ஐங்குரவர் ஓம்பல் இனன்நீக்கல் சேர்ந்தோர்க்குப் பைங்கூழ் களைகணாப் பார்த்தளித்தல் நையுளத்தர்க்கு உற்ற பரிவுஈர்த்தல் எண்ணான்கு அறநெறியில் உற்ற புரிதல் கடன்.

37

ஐந்து குரவரையும் காத்தலும், அவர்கட்கு வருந்துன்பத்தை நீக்குவதும், தன்னைச் சார்ந்தவர்க்கு நல்ல உணவினை ஆதரவாக ஆய்ந்து கொடுப்பதும், வருந்தும் நெஞ்சுடையார்க்கு நேர்ந்த துன்பத்தை நீக்குதலும், முப்பத்திரண்டாகிய தரும வழியில், தனக்கு இய்ற அறங்களைச் செய்வதும் (இல்வாழ்வானுக்குரிய) கடமையாம்.

கருத்து : இல்வாழ்வான், ஐந்து குரவரைப் பேணித், தன்னைச் சார்ந்தவர்க்கு உணவு கொடுத்தாதரித்து, வருந்துவோர் கவலையை மாற்றி, முப்பத்திரண்டு தருமங்களில் தனக்கியன்ற சில தருமங்களைச் செய்து வாழவேண்டும்.குரவர் ஐவராவர், குரு, அரசன், அன்னை, தந்தை, தம்முன் ஆகிய இவர்.

நல்லினம் சாரல் நயன்உணர்தல் பல்லாற்றான் நல்லினம் ஓம்பல் பொறையாளல் - ஒல்லும்வாய் இன்னார்க்கு இனிய புரிதல் நெறிநிற்றல் நல்நாப்பண் உய்ப்பதோர் ஆறு.

38

நல்லோர் கூட்டத்தைச் சேர்வதும், நல்ல வழிகளையறிவதும், பலவழிகளாலும் நல்லொழுக்கமுடையவர்களையே காத்தலும், பொறுமை என்னும் குணத்தைக்கொள்வதும், பகைவர்க்கும் அமையம் வாய்த்தபோது நன்மையான செயல்களைச் செய்வதும், நல்லொழுக்க நெறியில் நின்று வாழ்வதும், நடு விடத்திற் சேர்ப்பதற்குரிய. ஒரு வழியாம்.

கருத்து : நல்லாரைச் சேர்வதும், நல்வழியை யறிவதும், நல்லவர்களைக் காப்பதும், பொறுமையை மனங்கொள்வதும், பகைவர்க்கும் நன்மை செய்வதும், நல்வழியினிற்பதும் ஆகிய செயல்கள் மேலுலகத்திற் சேர்க்கும்.

முனியான் அறம்மறங்கள் முக்குற்றம் பேணான் நனிகாக்கும் ஒண்மை உறைப்படுத்தும் பண்போன் பனிநிலத்தின் வித்தாய்ப் பெயரான நடுக்கற்று இனியன்ஆ வான்மற்று இனி.

39

அறஞ்செய்வதில் வெறுப்பில்லாதவனும், பாவங்களையும் மூன்று குற்றங்களையும் செய்ய விரும்பாதவனும், மிகவும் காக்கப்படுகின்ற ஒழுக்கத்தை நிலை நிறுத்தும் குணமுடையவனும் (ஆகிய ஒருவன்) , குளிர்ந்த நிலத்தில் இட்ட விதையைப்போல, நிலையை விட்டுப் பெயராமல அச்சமற்று வாழ்ந்து இனிமேல் எவர்க்கும் இனியவன் ஆவான்.

கருத்து : அறம் புரிந்து பாவமும் குற்றமும் நீக்கி ஒழுக்கத்தைக்காத்து வாழும் ஒருவன் நிலை பெற்று இனியவனாய் இருப்பான்.

ஆ. துறவியல்

முப்பாலை வீழ்வார் விலங்கார் செறும்பாலை முப்பால் மயக்கேழ் பிறப்பாகி - எப்பாலும் மெய்ப்பொருள் தேறார் வெளிஓரார் யாண்டைக்கும் பொய்ப்பாலை உய்வாயாப் போந்து.

40

(அறம், பொருள், இன்பம் ஆகிய) மூன்று பகுதிகளையும் விரும்புவார் தம்மை வருத்தும் பகுதியை விட்டு விலகார், அம் மூன்று பகுதியால் மயங்கும் மயக்கத்தால் எழுவகைப் பிறப்புக்களும் உண்டாகி, எவ்விடத்திற்கும் பொய்யாகிய பகுதிகளையே பிழைக்கும் வழியாகக் கொண்டு சென்று, எவ்விடத்திலும் உண்மைப்பொருளைத் தெளியார்; பரவெளியையும் ஆராய்ந்தறியார்.

கருத்து : இல்வாழ்வின் நின்று இன்பம் பொருள் அறம். இவற்றை விரும்பியவர்க்குத் துன்பம் நீங்காது; எழுவகைப் பிறவியும் உண்டாகும், பொய்வாழ்க்கையே பிழைக்கும் வழியாகக் கொள்வர், மெய்ப்பொருளையும் அறியார். ஆதலால் துறவே சிறந்தது

உண்மைமால் ஈர்த்து இருள்கடிந்து சார்ஐயம் புண்விலங்கச் சார்பொருளைப் போற்றினோர் - நுண்ணுணர்வான் அண்ணா நிலைப்படுவர் ஆற்றல் விழுப்புலனை எண்பொருட்கு ஊர்இயலைச் சார்ந்து.

41

மெய்யாகத் தோன்றும் மயக்கத்தைக் கொடுத்து, அஞ்ஞானத்தையும் நீக்கி, சார்ந்த ஐயமும் துன்பமும் விலக, சார்தற்குரிய மெய்ப் பொருளை வணங்கியவர்கள், நுட்பமான அறிவினால் வலிய சிறந்த அறிவையும், (ஒருவராலும்) அணுகமுடியாத நிலை (ஆகிய முத்தி) யையடைவர்.

கருத்து : மயக்கத்தையும், அஞ்ஞானத்தையும் நீக்கிப் பரம் பொருளை வணங்கியவர் கூரிய அறிவால் நல்வழி சார்ந்து முத்தியடைவர்.

மாசகல வீறும் ஒளியன்ன நோன்புடையோர் மூசா இயற்கை நிலன்உணர்வார் - ஆசகற்றி இன்னல் இனிவாயாக் கொள்வார் பிறப்பிறப்பில் துன்னார் அடையும் நிலன்.

42

களங்கமற்றுப்பெருகும் ஒளிபோன்ற தவத்தினையுடையார். அழியாத இயற்கையையுடைய இடம் (ஆகிய முத்தி) அறிவார், முக்குற்றங்களையும் நீக்கித் துன்பத்தினை இனிய வழியாகக் கொள்வார், பிறப்பிலும் இறப்பிலும் அவற்றிற்குரிய இடங்களிலும் சேரமாட்டார்.

கருத்து : சிறந்த தவமுடையவர் முத்தியுலகத்தையே அறிந்து சேர்வார். துன்பத்தை இன்பத்திற்கு வழியாகக் கொள்வார். பிறப்பு இறப்பு இவற்றை நீக்குவர்.

பேராப் பெருநிலன் சேய்த்தே உடம்பொன்றா பேரா ஒருநிலனாம் நீங்காப் பெரும்பொருளை ஏரா அறிந்துய்யும் போழ்து.

43

பலவகையுடம்புகளிலும் பொருந்தியும் பொருந்தாத, பெயராத ஒப்பற்ற உலகமாக, (எப்போதும்) நீங்காத பெருமையுடைய பரம்பொருளை, எழுச்சியாக வுணர்ந்து பிழைக்கும் பொழுதில், இடம் விட்டுப் பெயராத பெருநிலமாகிய முத்தியுலகம் தூரத்துள்ளதோ (அடுத்ததுதான்)

கருத்து : பரம்பொருளை யுணர்ந்து வாழ்வார்க்கு முத்தி சேர்தல் எளிது.

மெய்யுணர்வே மற்றதனைக் கொள்ள விழுக்கலனாம் பொய்யுணர்வாம் ஈண்டிய எல்லாம் ஒருங்கழியும் ஐயுணர்வான் உய்ந்துஅறம் சார்பாச் சார்பொறுக்க நையா நிலைவேண்டு வார்.

44

பொய்யாகிய அறிவினால் சேர்க்க வந்து சேர்ந்த பொருள்கள் எல்லாம் ஒன்றாகச் சேர்ந்து கெடும், அழியாத நிலையாகிய முத்தியை விரும்புவோர், ஐந்தாகிய அறிவினால் ஆராய்ந்து, துறவறத்தைச் சார்பாகக்கொண்டு, பற்றுக்களை யெல்லாம் ஒழிக்க, உண்மையறிவே அம் முத்தியுலகத்தை யடைவதற்குச் சிறந்த புணையாகும்.

கருத்து : பொய்யுணர்வினாற் சேர்த்த பொருள்களெல்லாம் தொலையும். பற்றுக்களையெல்லாம் ஒழித்துப் பின் மெய்யுணர்வு பெற்றால் முத்தியுலகம் பெறலாம்.

ஒன்றுண்டே மற்றுடலில் பற்றி வினையிறுக்கும் பொன்றா உணர்வால் விலங்கொறுக்க பைம்மறியாத் தன்பால் பெயர்க்குந்து பற்றுதலைப் பட்டோர் நன்பால் அறிந்தார் துறந்தார் வரல்உய்ந்தார் புன்பாலால் சுற்றப் படார்.

45

உயிர் என்பது ஒன்று உண்டு (இருக்கிறது) . (அவ்வுயிர்) உடம்பைப் பற்றி நின்று வினைகளை மேன்மேலும் கொடுக்கின்றது, கெடாத நல்லறிவினால் அப்பாசத் தளையைத் தகர்த்து விடுக; பையின் உட்புறமாகத் திருப்பிப்பார்ப்பதுபோலத் தன் பகுதியைப் பெயர்த்துப்பார்க்கும் பற்றினைக் கூடியவர்களே, நல்ல வழிகளை யறிந்தவராவார், அவரே துறவிகளாவார், பிறப்பினின்றும் நீங்கியவர், சிறிய பகுதிகளாற் சூழப்படாதவராவர்.

கருத்து : உடம்பில் உயிர் நின்று வினை செய்யச்செய்ய மேன்மேலும் பிறப்பு வளரும் என்பதையும் உடம்பின் இழிவையும் அறிந்தவர் துறவிகளாவார். அவர்கள் பிறவாது முத்தியை யடைவார்.

இன்னிலை முற்றிற்று.